ԵՄ-ն ցանկանում է մինչև ամռան վերջ ավելի քան 900 միլիարդ ԱՄՆ դոլար տրամադրել՝ կորոնավիրուսի տնտեսական հետևանքների չեզոքացման համար
Եվրամիությունը հույս ունի մինչև ամռան վերջ իր՝ ավելի քան 900 միլիարդ ԱՄՆ դոլար արժողությամբ կորոնավիրուսի տնտեսական հետևանքների չեզոքացման ֆոնդից ֆինանսական միջոցներ տրամադրել՝ համավարակի պատճառով անկում ապրած տնտեսությունը վերականգնելու համար: Նման հայտարարությամբ են հանդես եկել միության բարձրաստիճան պաշտոնյաները, գրում է Al Arabiya-ն:
Նշվում է՝ Եվրահանձնաժողովի նախագահ Ուրսուլա ֆոն դեր Լեյենը, Եվրախորհրդարանի ղեկավար Դեյվիդ Սասոլին և Պորտուգալիայի վարչապետ Անտոնիո Կոստան կոչ են արել դաշինքի անդամ 27 երկրներին «արագ շարժվել» և հաստատել որոշումը, որը թույլ կտա Բրյուսելում գտնվող ԵՄ գործադիրին քայլեր ձեռնարկել:
«Հենց ֆինանսական միջոցների տրամադրման մասին որոշումը վավերացվի, Հանձնաժողովը շուկա կմտնի և փոխհատուցումներ կիրականացնի», - ասել է Լեյենը մամուլի ասուլիսում:
Նա հավելել է նաև, որ հանձնաժողովն ի վիճակի է անմիջապես տրամադրել անհրաժեշտ միջոցների 13 տոկոսը, իսկ մինչև տարվա կեսն այն կկարողանա ամբողջությամբ հատկացնել նաև անհրաժեշտ առաջնային միջոցները:










