Սյունիքի մարզի Ագարակ գյուղի ուղղությամբ ադրբեջանական կողմից անկանոն կրակոցներ են արձակվել, այս պահին համեմատաբար հանգիստ է. գյուղապետ

16:14 • 15.02.21

Սյունիքի մարզի Ագարակ գյուղի ուղղությամբ երկու օր առաջ ադրբեջանական կողմից անկանոն կրակոցներ են արձակվել, այս պահին համեմատաբար հանգիստ է, կրակոցները դեպի վերև էին ուղղված եղել, գյուղում վնասներ չկան. Tert.am-ին տեղեկացրեց Ագարակի գյուղապետ Հայկ Սահակյանը:

Գյուղապետի խոսքով՝ կրակոցներն արձակվում են խոշոր տրամաչափի զինատեսակներից, գյուղում կա 40 տուն:  Հայկ Սահակյանը նաև նշեց, որ նոյեմբերի 9-ի եռակողմ հայտարարությունից հետո Ագարակ գյուղի ճանապարհը փակվել է, որն ամենակարճ, ասֆալտապատ ճանապարհն էր.

«Այդ ճանապարհը 12 կմ էր, 8 րոպեի ընթացքում հասնում էինք քաղաք, հիմա ուրիշ ճանապարհով ենք երթևեկում, մեր ճանապարհը 6 կմ-ով երկարել է, իսկ այս նոր ճանապարհը ծանր ճանապարհ է և ասֆալտապատված չէ: Համայնքապետը ճանապարհի փոսերը լցրել, հարթեցրել է, սակայն ասֆալտապատման հնարավորության մասին տեղեկություն չկա»:

Հայկ Սահակյանը նշեց, որ երկու օր առաջ ռուս սահմանապահներին տեղեկացրել են կրակոցների մասին, սահմանապահները եկել, գիշերն անցկացրել են դիրքերում և տեսել, որ կրակոցները մեր կողմից չի արձակվում: