Պերուում կորոնավիրուսի դեմ պատվաստումը երկրի ԱԳ նախարարի հրաժարականի պատճառ է դարձել

12:03 • 15.02.21

Պերուի արտգործնախարար էլիսաբեթ Աստետե Ռոդրիգեսը կիրակի հրաժարական է ներկայացրել: Ինչպես փոխանցում է «Իզվեստիա»-ն, հրաժարականի համար պատճառ է հանդիսացել կորոնավիրուսի դեմ նրա պատվաստումը նախքան բնակչության շրջանում պատվաստման գործընթացի մեկնարկը:

Երկրի նախագահ Ֆրանսիսկո Սագաստին իր թվիթերյան էջում հայտնել է, որ ընդունել է ԱԳ նախարարի հրաժարականը:

«2020 թվականի դեկտեմբերին և 2021 թվականի հունվարի մի քանի անձացն հետ շփվելուց հետո, որոնց մոտ կորոնավիրուս է ախտորոշվել, ես որոշեցի ընդունել չինական Sinopharm պատվաստանյութն առաջինն ստանալու առաջարկը», - հայտնել է Աստետեն՝ հավելելով, որ պատվաստվել է հունվարի 22-ին: Վերջինս նշել է նաև, որ պատվաստվելու որոշում է կայացրել, քանի որ 68 տարեկան է և գտնվում ռիսկային գոտում:

Անցյալ շաբաթ պատվաստման ընթացակարգի հետ կապված սկանդալի պատճառով հրաժարական է ներկայացրել երկրի առողջապահության նախարար Պիլար Մացետին: Ավելի վաղ հայտնի էր դարձել, որ երկրի նախկին նախագահ մարտին Վիսկարան պատվաստվել է դեռևս անցյալ տարվա հոկտեմբերին, երբ գտնվում էր իշխանության ղեկին:

Երկրի իշխանությունները պայմանագիր են կնքել 2021 թվականին Sinopharm պատվաստանյութի 38 մլն չափաբաժին ներկրելու մասին: Առաջին միլիոնն ակնկալվում է ստանալ փետրվարի կեսերին: Պերուում այժմ անցկացվում են տվյալ դեղամիջոցի կլինիկական փորձարկումների երրորդ փուլը:

Պերուում կորոնավիրուսով վարակվածների թիվը գերազանցել է 1,2 մլն-ը, մահացածներինը՝ 43 հազարը: