Եվրապատգամավորը Նավալնիի բանտարկությունը՝ ՌԴ–ի նկատմամբ պատժամիջոցներ սահմանելու համար անբավարար պայման է համարում

17:01 • 19.02.21

Եվրախորհրդարանի իռլանդացի պատգամավոր Քլեր Դալին ասել է, որ ռուս ընդդիմադիր գործիչ Ալեքսեյ Նավալնիի բանտարկությունը թույլ հիմք է Ռուսաստանի դեմ նոր պատժամիջոցներ սահմանելու համար, հայտնում է «ՌԻԱ Նովոստի» լրատական գործակալությունը։

«Պատժամիջոցները ոչ ոքի ձեռնտու չեն, դրանք չեն բխում Ռուսաստանի կամ Եվրոպայի բնակչության շահերից: Այն ընկերությունները, որոնք ցանկանում են Ռուսաստանի հետ գործ ունենալ, պատժամիջոցներ չեն ուզում։ Ես հետագա պատժամիջոցների կարիքը չեմ տեսնում», - ասել է Դալին:

Ըստ նրա, Նավալնիի հետ կապված իրավիճակին ԵՄ արձագանքը բխում էր դաշինքի աշխարհաքաղաքական նպատակներից, այլ ոչ թե մարդու իրավունքների շուրջ որևէ մտահոգությունից: Պատգամավորը նշել է․ «Միակ պատճառը, որի համար Եվրամիության տարածքում մարդիկ անհանգստանում են Նավալնիի համար՝ նրա Ռուսաստանում գտնվելու փաստն է: Դա պարզապես զենք է Ռուսաստանի իշխանությունների դեմ: Իրականում դա ընդհանրապես կապ չունի մարդու իրավունքների հետ»։

Մեկնաբանելով եվրոպական դիվանագիտության ղեկավար Ժոզեպ Բորելի` Մոսկվա կատարած այցից հետո՝ նրան ուղղված պաշտոնաթողության մասին կոչերը, Դալին ասել է, որ համաձայն չէ դրանց հետ․ «Ես չէի միանա նրա հրաժարականի կոչերին՝ Ռուսաստան կատարած ուղևորության պատճառով: Իրականում նա ճիշտ էր, և սա նրա լավագույն քայլերից մեկն էր»:

Ավելի վաղ, Ռուսաստանի ԱԳՆ-ն՝ Նավալնիի իրավիճակը մեկնաբանող օտարերկրյա քաղաքական գործիչներին խորհուրդ էր տվել հարգել միջազգային իրավունքը և զբաղվել իրենց երկրների խնդիրներով` նշելով, որ այս թեմայով արևմտյան քաղաքական գործիչների հայտարարությունները «նման են նախագծի»: Կրեմլը հայտարարել է, որ մտադիր չէ լսել Նավալնիի մասին արտերկրից հնչող հայտարարությունները:

Փետրվարի 2-ին Մոսկվայի Սիմոնովսկի դատարանը որոշում է կայացրել չեղյալ համարել «Իվ Ռոշեի գործով» Նավալնիի պայմանական պատիժը և այն փոխարինել 3,5 տարի ազատազրկմամբ ընդհանուր ռեժիմի գաղութում` փորձաշրջանի պայմանների բազմաթիվ խախտումների պատճառով: