Պետդումայի պատգամավորը դիմել է ՌԴ քննչական կոմիտեի նախագահին` Արցախում Ադրբեջանի ագրեսիան արդարացնող «գիտնականի» նկատմամբ քայլեր ձեռնարկելու համար
Ռուսաստանի Դաշնության Պետդումայի պատգամավոր Վիտալի Միլոնովը դիմել է Ռուսաստանի քննչական կոմիտեի ղեկավար Ալեքսանդր Բաստրիկինին ՝ խնդրելով միջոցներ ձեռնարկել «արևելագետ» Կիրիլ Սեմյոնովի դեմ, որի հասարակական գործունեությունը կարող է վնասել Ռուսաստանի շահերին: Այս մասին տեղեկանում ենք Ռուսաստանի հայերի միության ֆեյսբուքյան էջից:
Ֆեյսբուքյան էջում հրապարակված նամակում պատգամավորը Բաստրիկինի ուշադրությունը հրավիրել է Թուրքիայի գաղափարախոսությունն ու շահերը խթանող հրապարակումների վրա՝ ի վնաս Ռուսաստանի ազգային շահերի:
Միլոնովի խոսքերով ՝ ռուսական և արտասահմանյան աղբյուրներում հաճախ են հայտնվում նյութեր, որոնք աղավաղում են Սիրիայում և Լեռնային Ղարաբաղում խաղաղ գործընթացին Ռուսաստանի մասնակցության վերաբերյալ փաստերը:
Նյութերի հեղինակը Կիրիլ Սեմյոնովն է, որը ներկայանում է որպես Նորարարական զարգացման ինստիտուտի իսլամական հետազոտությունների կենտրոնի ղեկավար:
«Իր հայտարարություններում Կ. Սեմենովը բացահայտորեն արդարացնում է Ադրբեջանի ագրեսիան Լեռնային Ղարաբաղում, քարոզում է Թուրքիայի կողմից վարվող արտաքին քաղաքականության նշանակությունը և միջազգային ասպարեզում Ռուսաստանի քաղաքականության անարդյունավետությունը», - նշել է Միլոնովը:
Բացի այդ, Սեմյոնովի հրապարակումներում կարելի է նկատել Լիբիայի, Սիրիայի և Արևելյան Միջերկրական ծովի իրադարձությունների վերաբերյալ թուրքական տեսակետի բացահայտ խթանում:
Նա հաճախ արդարացնում է արմատական խմբավորումների, այդ թվում ՝ «Իսլամական պետության» և «Մահմեդական եղբայրների» գործողությունները:










