Զարիֆը նշել է, որ Իրանը դեմ է Սիրիայում և Իրաքում թուրքական զորքերի տեղակայմանը

16:53 • 23.02.21

Իրանի արտգործնախարար Մոհամմեդ Ջավադ Զարիֆը հայտարարել է, որ իր երկիրը դեմ է Թուրքիայի զինված ուժերի տեղակայմանը Սիրիայում և Իրաքում, և ասել, որ երկու երկրների հետ կապերի հարցում Թուրքիայի կառավարության մոտեցումը սխալ է, հայտնում է Ahval–ը:

Թուրքիան զորքեր է ուղարկել Սիրիայի և Իրաքի հյուսիսային տարածքներ՝ քուրդ զինյալների դեմ պայքարելու և սիրիական ընդդիմությունն ուժեղացնելու նպատակով։ Թուրքիան պատրաստվում է երկու երկրներում էլ ռազմաբազաներ հիմնել՝ հակառակ իրենց տարածքները խախտելու վերաբերյալ Բաղդադի և Դամասկոսի քննադատությանը։

«Մենք մերժում ենք Թուրքիայի ռազմական ներկայությունը Սիրիայում և Իրաքում, և Դամասկոսի ու Բաղդադի նկատմամբ Անկարայի քաղաքականությունը համարում ենք սխալ», - ասել է Զարիֆը:

Տարածաշրջանային քաղաքականության հարցում Իրանի և Թուրքիայի տարաձայնություններն առավել ընդգծված են Սիրիայում: Թուրքիան սատարում է Սիրիայի ընդդիմությանը 2011 թվականից սկսված քաղաքացիական պատերազմում, մինչդեռ Իրանը սատարում է նախագահ Բաշար Ալ-Ասադի կառավարությանը։ Զարիֆն ասել է, որ Սիրիայում՝ Իրանի միակ նպատակը ահաբեկչության դեմ պայքարն է։

Թուրքիան, Իրանը և Ռուսաստանը գլխավորում են Աստանայի գործընթացը, որը նպատակ ունի աջակցել սիրիական հակամարտության կարգավորմանը: Երեք երկրները համատեղ հայտարարություն են տարածել՝ կոչ անելով փոխզիջման գնալ:

Զարիֆի հայտարարությունը հաջորդել է Թուրքիայի նախագահ Ռեջեփ Թայիփ Էրդողանի և իր իրանցի գործընկեր Հասան Ռոհանիի միջև կայացած հեռախոսազրույցին, որի ընթացքում քննարկվել է անվտանգության և տնտեսական ոլորտներում երկկողմ համագործակցությունը:

Ռոհանիի հետ զրույցում Էրդողանն ասել է, որ Միացյալ Նահանգները պետք է վերացնի Իրանի դեմ պատժամիջոցները: