«Փորձում է բանակի պատրաստվածությունը չապահովելու մեղքն իր վրայից հանել և այն բարդել Ռուսաստանի վրա». ռուս ռազմական փորձագետը մեկնաբանել է` ինչու է Փաշինյանը քննադատել «Իսկանդեր» համակարգերը
Նիկոլ Փաշինյանը քննադատում է ռուսական զենքը, որպեսզի արդարացնի Ադրբեջանի դեմ ռազմական գործողություններին հայկական բանակի պատրաստված չլինելու հանգամանքը: РИА Новости-ի փոխանցմամբ՝ նման կարծիք է հայտնել ռազմական փորձագետ, ռազմական գիտությունների դոկտոր Կոնստանտին Սիվկովը:
«Նրան մեղադրում են, որ չի ապահովել բանակի պատրաստվածությունն Ադրբեջանի դեմ ռազմական գործողություններ վարելուն: Դա համապատասխանում է իրականությանը: Այս պայմաններում նա փորձում է մեղքն իր վրայից հանել և այն բարդել Ռուսաստանի վրա, թե իբրև Ռուսաստանը զենքի ոչ լիակատար համակարգեր է մատակարարել»,- հայտարարել է Սիվկովը:
Վերջինս չի բացառել, որ հետագայում Հայաստանի պաշտոնատար անձանց կողմից քննադատություններ կհնչեն ռուսական այլ զենքերի վերաբերյալ:
Փաշինյանի՝ «հրթիռը պայթել է 10%-ով» արտահայտությունը Սիվկովն առաջարկել է հասկանալ որպես հրթիռների 10 տոկոսանոց կատարողականություն: Այսինքն, օրինակ, արձակվել է տաս հրթիռ, սակայն պայթել է դրանցից միայն մեկը:
Նրա կարծիքով՝ ռուսական զենքի «սևացման» ևս մեկ պատճառ կարող է լինել արևմտյան քաղաքական գործիչների աչքերում վերականգնվելու փորձը: Սիվկովն ընդգծել է, որ Փաշինյանը ստիպված է եղել ընդունել Ռուսաստանի միջնորդությունը հակամարտության կարգավորման գործում և համաձայնել ռուս խաղաղապահների տեղակայմանը, ինչի արդյունքում Արևուտքը «զգալիորեն կորցրել է իր ազդեցության աստիճանը տարածաշրջանում»:
Նախօրեին 1in.am-ին տված հարցազրույցում Նիկոլ Փաշինյանն անդրադարձել է ՀՀ երրորդ նախագահ Սերժ Սարգսյանի հայտարարությանը, ըստ որի՝ ինքը զարմացած է, թե ինչու պատերազմի 3-րդ կամ 4-րդ օրն «Իսկանդեր»-ը չի կիրառվել:
Նվեր Մնացականյանը Փաշինյանից հետաքրքրվել է՝ այդ ակնարկն իրե՞ն է ուղղված, ինչին ի պատասխան Նիկոլ Փաշինյանն ասել է. «Այդ ակնարկը, գուցե, հասցեագրված է նաև ինձ, բայց կարծում եմ՝ մերժվածը պետք է որ բազմաթիվ հարցերի պատասխան իմանա և չտա հարցեր, որոնց պատասխանն ինքը գիտի: Իսկ գուցե պատասխանե՞ն՝ ինչո՞ւ կրակած «Իսկանդեր»-ը (հրթիռը, - խմբ.) չի պայթել կամ պայթել է, օրինակ՝ 10 տոկոսով»: Դիտարկմանը՝ այդպե՞ս էլ է լինում, Փաշինյանը նշել է. «Չգիտեմ: 80-ականների զե՞նք էր գուցե»:










