ՀՀ նախագահը ժամը 15:40 կընդունի ընդդիմության ներկայացուցիչներին

15:17 • 26.02.21

Այն մարդիկ, ովքեր մտահոգ են Հայաստանի ապագայով, ցանկություն ունեն հանդիպել ՀՀ նախագահի հետ: Այս մասին նախագահական նստավայրի մոտ հայտարարել է ՀՅԴ անդամ Գեղամ Մանուկյանը:

«Մենք՝ Հայաստանի Հանրապետության քաղաքացիներս, ովքեր մտահոգ են մեր երկրում օրինականության և անվտանգության համակարգով, ովքեր մտահոգված են Զինված ուժերի համար, հիմա նախագահական նստավայրի մոտ ենք և դիմում ենք հանրապետության նախագահին՝ պատվիրակության հետ հանդիպման առաջարկով, որպեսզի փոխանցենք մեր մտահոգությունները և սպասենք նաև նախագահի աշխատակազմի արձագանքին»,- ասաց Գեղամ Մանուկյանը։

Նշենք, որ Նիկոլ Փաշինյանը ՀՀ նախագահ Արմեն Սարգսյանին առաջարկել է աշխատանքից ազատել ԳՇ պետ Օնիկ Գասպարյանին։ Նախագահն ունի եռօրյա ժամկետ՝ Նիկոլ Փաշինյանի առաջարկը հաստատելու կամ մերժելու համար։

Քիչ անց «Հանուն հայրենիքի փրկության շարժման» համակարգող Իշխան Սաղաթելյանը հայտնեց, որ նախագահը պատրաստ է հանդիպել ընդդիմության պատվիրակության հետ:

«15:40 նախագահը կընդունի մեր պատվիրակությանը, մենք այդ ժամին պատվիրակությունով կհանդիպենք Հայաստանի Հանրապետության նախագահի հետ, իսկ դրանից հետո Բաղրամյանի հրապարակում կհայտնենք ձեզ արդյունքների մասին»,- ասաց Իշխան Սաղաթելյանը: