«Ոմանք ակնկալում էին՝ ՌԴ-ն կձախողի համավարակի դեմ պայքարը, բայց այդպես չեղավ»․ Պուտինը կոչ է արել միավորել ջանքերը կորոնավիրուսը հաղթահարելու համար

16:37 • 04.03.21

Միայն ջանքերը միավորելով է հնարավոր աշխարհում կորոնավիրուսի նկատմամբ հաղթանակ տանել,  «Մենք միասին ենք» փոխօգնության համառուսաստանյան ակցիայի մասնակիցների հետ հանդիպման ժամանակ հայտարարել է Ռուսաստանի նախագահ Վլադիմիր Պուտինը, փոխանցում է ria.ru-ն։

«Մենք կարծում ենք, որ միայն ջանքերը միավորելով, այդ թվում՝ միջազգային ասպարեզում, կարելի է հասնել COVID-ի նկատմամբ վերջնական հաղթանակի»,- ասել է նա:

ՌԴ նախագահը հավելել է, որ «ոմանք ակնկալում էին՝ ՌԴ-ն կձախողի համաճարակի դեմ պայքարը, բայց այդպես չեղավ»։

«Այն, որ հիվանդացության մակարդակը շարունակաբար նվազում է՝ պետության և կամավորական շարժումների, մասնագետների, բժիշկների, բուժքույրերի, շտապօգնության բրիգադների և հենց պետության համալիր ջանքերի արդյունքն է»,- հավելել է Պուտինը։