Վերջին մեկ շաբաթում կորոնավիրուսով հիվանդացության դեպքերն աշխարհում ավելացել են 2%-ով, մահվան ելքով դեպքերը` նվազել 6%-ով. ԱՀԿ
Անցյալ շաբաթ կորոնավիրուսով հիվանդացածների թիվը 2 տոկոսով գերազանցել է նախորդ շաբաթվա տվյալները, իսկ մահվան ելքով դեպքերը նվազել են 6 տոկոսով: Ինչպես հայտնում է «ՏԱՍՍ» գործակալությունը, այս տվյալները նշված են Առողջապահության համաշխարհային կազմակերպության ամենշաբաթյա տեղեկագրում:
«Անցյալ շաբաթ տեղեկություն է ստացվել վարակման ավելի քան 2,7 մլն նոր դեպքերի մասին, ինչը 2 տկոսով ավելին է նախորդ շաբաթվա համեմատ: Գլոբալ առումով, գրեթե աշխարհի երկրների կեսում նոր դեպքերի թիվը նվազել է, ապա մյուս կեսում աճ է գրանցվել»,- արձանագրել է ԱՀԿ-ն:
Համաճարակաբանական տեղեկագրի համաձայն՝ մարտի 1-7-ն ամբողջ աշխարհում գրանցվել է «Քովիդ-19»-ով վարակման 2 734 381 դեպք, որից 60 323-ը՝ մահվան ելքով:
Անցած շաբաթվա ընթացքում հիվանդացության առավել նկատելի աճ է գրանցվել Աֆրիկայում (10%) և Արևելյան միջերկրածովյան տարածաշրջանում (10%), ինչպես նաև Եվրոպայում (4%): Մահացության ցուցանիշը մեծացել է Արևելյան միջերկրածովյան տարածաշրջանում (9%), սակայն նվազել է մյուս բոլոր տարածաշրջաններում:
Հյուսիսային և Հարավային Ամերիկայում 7 օրում արձանագրվել է վարակման ավելի քան 1,1 մլն, մահվան՝ ավելի քան 32 000 դեպք: Եվրոպայում մեկ շաբաթում վարակվել է ավելի քան 1,1 մլն մարդ, մահացել՝ ավելի քան 20 հազարը: Արևելյան միջերկրածովյան տարածաշրջանում արձանագրվել է հիվանդացության ավելի քան 228 հազար, մահվան՝ ավելի քան 2700 դեպք:










