«Աղջիկների կրթությունը կլիմայի փոփոխության դեմ պայքարի բանալին է»․Մալալա Յուսուֆզայ
Աղջիկների կրթությունն ու երիտասարդ կլիմայական առաջնորդների նկատմամբ լուրջ վերաբերմունքը կլիմայի փոփոխության խնդրի լուծման բանալիներն են, օրերս Chatham House բրիտանական վերլուծական կենտրոնի առցանց միջոցառման ժամանակ հայտարարել է Խաղաղության նոբելյան մրցանակի դափնեկիր, պակիստանցի իրավապաշտպան Մալալա Յուսուֆզայը, գրում է Reuters-ը։
23-ամյա Յուսուֆզայը հայտարարել է, որ աղջիկների և երիտասարդ կանանց կրթությունը նրանց հնարավորություն կտա իրենց համայնքներում դառնալ կլիմայական ճգնաժամի լուծման մի մասը:
«Աղջիկների կրթությունը, գենդերային հավասարությունը և կլիմայի փոփոխությունն առանձին հարցեր չեն։ Աղջիկների կրթությունը և գենդերային հավասարությունը կարող են օգտագործվել որպես կլիմայի փոփոխության դեմ լուծումներ»,-հայտարարել է Մալալան:
Նա նաև համաշխարհային առաջնորդներին կոչ է արել ուշադրություն դարձնել երիտասարդ կլիմայական ակտիվիստներին։
«Լսե՛ք այն երիտասարդներին, որոնք ղեկավարում են կլիմայական շարժումը։ Երիտասարդները մեր առաջնորդներին հիշեցնում են, որ կլիմայի վերաբերյալ իրազեկվածությունը և կլիմայական փոփոխության դեմ պայքարը պետք է իրենց առաջնահերթությունը լինեն»,- հավելել է նա։
Նոբելյան մրցանակի ամենաերիտասարդ դափնեկիրը մրցանակի է արժանացել հայրենիքում տիրող դաժան խտրականության պայմաններում իր առողջությունն ու կյանքը վտանգի ենթարկելով մարդու իրավունքների պաշտպանության և հատկապես՝ կանանց ու երեխաների կրթության գործը կազմակերպելու համար: Նրա պայքարը միջազգային արձագանք է ստացել, և, ինչպես նշել է Պակիստանի նակին վարչապետ Շահիդ Խաքան Աբասին, նա դարձել է հայրենի երկրի ամենանշանավոր քաղաքացին:
2012 թվականի հոկտեմբերի 9-ին նրա հանդեպ մահափորձ է կատարվել․ թալիբ մի հրաձիգ ինքնաձիգից կրակ է բացել նրա ուղղությամբ, սակայն Յուսուֆզայի կյանքը հաջողվել է փրկել։










