«Պատվաստումների եվրոպական ռազմավարությունը հաջող է, քանի որ ձեռք են բերվել պատվաստանյութեր, որոնք իսկապես գործում են». Եվրահանձնաժողովի ներկայացուցիչ

17:34 • 15.03.21

Եվրամիությունն այն կարծիքին է, որ կորոնավիրուսի դեմ պատվաստումների եվրոպական ռազմավարությունը հաջող է, քանի որ ձեռք են բերվել պատվաստանյութեր, որոնք իսկապես գործում են:

Այս մասին Բրյուսելում կայացած ճեպազրույցում հայտարարել է Եվրահանձնաժողովի ներկայացուցիչ Էրիկ Մամերը, գրում է «ՌԻԱ Նովոստի»-ն:

«Մենք մշակել ենք պատվաստանյութերի ձեռքբերման ընդհանուր ռազմավարություն, որն անհրաժեշտ էր, և որը հաստատել են ԵՄ-ի մի շարք պետությունների և կառավարությունների ղեկավարներ: Այս ռազմավարությունը երաշխավորում է ԵՄ անդամ բոլոր պետությունների հասանելիությունը պատվաստանյութերին: Մեր ռազմավարությունը հաջող է, քանի որ մենք ձեռք ենք բերել պատվաստանյութեր, որոնք իսկապես գործում են»,- շեշտել է նա և հավելել, որ դեղամիջոցները գրանցվել են եվրոպական կարգավորիչի կողմից, իսկ ինչ վերաբերում է դրանց քանակին, ապա պատվաստանյութերը միանգամայն բավարար են:

Մամերի խոսքով՝ պատվաստումների հետ կապված խնդիրները բացառապես առնչվում են դեղագործական ընկերությունների՝ պատվաստանյութերի արտադրությունը կազմակերպելու և ԵՄ-ի հետ համաձայնեցված մատակարարման ժամանակացույցին հետևելու հնարավորության հետ:

Հիշեցնենք՝ ներկայում ԵՄ շուկայում թույլատրվում են Pfizer/BioNTech (գնվել է շուրջ 600 միլիոն դեղաչափ), Moderna (գնվել է 160 միլիոն դեղաչափ) և AstraZeneca (գնվել է մոտ 400 միլիոն դեղաչափ) ընկերությունների կողմից արտադրված պատվաստանյութերը: Բացի այդ, Եվրոպական հանձանաժողովը ԵՄ-ին պատվաստանյութեր մատակարարելու առնչությամբ պայմանագրեր է կնքել Johnson & Johnson, Sanofi-GSK, CureVac ընկերությունների հետ:

Ինչպես ավելի վաղ տեղեկացրել էր Tert.am-ը, Ռուսաստանի առողջապահության նախարարությունն օգոստոսին գրանցել էր կորոնավիրուսի դեմ աշխարհում առաջին պատվաստանյութը, որը մշակվել Է Գամալեայի անվան համաճարակաբանության և մանրԷաբանության ազգային հետազոտական կենտրոնում (ՀՄԱՀԿ)՝ Ռուսաստանի ուղղակի ներդրումների հիմնադրամի հետ համատեղ: Այն ստեղծվել Է մարդու ադենովիրուսային վեկտորների բազայի վրա և ստացել Է «Սպուտնիկ V» անվանումը: Այն լուծույթ Է՝ միջմկանային ներարկման համար: