Եթե պաշտոնյաները վստահ լինեն, որ Նիկոլ Փաշինյանի կողմից կստանան քննադատող արձագանք, լրագրողների նկատմամբ այդպիսի վերաբերմունք չեն դրսևորի. Անի Գևորգյան (տեսանյութ)
Եթե պաշտոնյաները վստահ լինեն, որ Նիկոլ Փաշինյանի կողմից կստանան քննադատող արձագանք, լրագրողների նկատմամաբ այդպիսի վերաբերմունք չեն դրսևորի։ Այս մասին «Կենտրոն» հեռուստաընկերության «Իմպուլս» հաղորդման եթերում ասել է լրագրող Անի Գևորգյանը՝ անդրադառնալով գործընկերոջ՝ Փայլակ Ֆահրադյանի և տարածքային կառավարման և ենթակառուցվածքների նախարար Հակոբ Արշակյանի միջև տեղի ունեցած միջադեպին։
«Եթե պաշտոնյան ցերեկը նստել է սրճարանում, ինքը պետք է պատրաստ լիներ, որ իրեն կարող են հարցեր տալ, կլինեն դեպքեր, որ իր որոշ գործողություններ կարող են սահմանափակվել, պաշտոնյան պետք է դա գիտակցի»,-ասաց ԱՆի Գևորգյանը:
Նրա խոսքով՝ պաշտոնյան պետք է պատրաստ լինի, որ իրեն կարող են թիրախավորել, հատկապես այն պաշտոնյան, որը վերջերս բյուջեի հաշվին բուկլետներով էր ներկայացնում Հայաստանի սպառազինությունը, միայն դրանից հետո նա այդ պաշտոնը պետք է էլ չզբաղեցներ։
Անի Գևորգյանն ընդգծեց՝ տեսանյութում պարզ երևում է՝ Փայլակ Ֆահրադյանը հարվածներ չի հասցրել Հակոբ Արշակյանին:
«Տեղի ունեցածը պետք չէ մեկնաբանել որպես ծեծկռտուք, քանի որ իմ գործընկեր Փայլակ Ֆահրադյանը հարվածներ չի հասցրել Հակոբ Արշակյանին, փոխարենը՝ կադրում երևում է՝ ոնց է Հակոբ Արշակյանը հարվածներ հասցնում լրագրողին, այսինքն՝ մենք գործ ունենք հարձակման հետ»,- նշեց լրագրողը:
Միջադեպի մասնակից, լրագրող Փայլակ Ֆահրադյանն էլ նշեց, որ ինքն իրականացրել է իր մասնագիտական պարտականությունները:
«Ես հանրային վայրում հանրության շահն եմ պաշտպանել, քանի որ մարդկանց հետաքրքրում է՝ ինչու է ԱԹՍ արտադրող և Աբու-Դաբիում Հայաստանը խայտառակ անող նախարարը նստում սրճարանում իր աշխատանքային ժամին»,- նշեց Փայլակ Ֆահրադյանը:
Լրագրող Անի Գևորգյանը, խոսելով լրագրող-պաշտոնյա աշխատանքային փոխհարաբերություններին, անդրադարձավ իր և ԱԺ պաշտպանության և անվտանգության հարցերի հանձնաժողովի նախագահ, «Իմ քայլի» պատգամավոր Անդրանիկ Քոչարյանի միջև տեղի ունեցած միջադեպերին և նշեց, որ դիմել է ԱԺ նախագահ Արարատ Միրզոյանին՝ պաշտոնյայի կողմից էթիկայի կանոնների կոպիտ խախտման փաստը քննարկելու և դրա վերաբերյալ Ազգային ժողով եզրակացություն ներկայացնելու համար սահմանված կարգով ժամանակավոր հանձնաժողով ստեղծելու գործընթաց սկսելու պահանջով:
«Նշեմ, որ ԱԺ-ից որևէ ակնկալիք չունեմ, պարզապես սա արել եմ, որպեսզի հասարակությունը տեսնի՝ լրագրողները հետևողական կերպով փորձում են իրենց իրավունքներն իրացնել: ԱԺ-ից արձագանք չստանալու դեպքում կարող եմ դիմել դատարան, իսկ դատական ատյաններից արձագանք չստանալու դեպքում կարող եմ դիմել ՄԻԵԴ»,- ասաց Անի Գևորգյանը:










