Սպիտակ տունը հայտարարել է ԱՄՆ-ում անօրինական ներգաղթյալների երեխաների համար նոր կենտրոններ բացելու մասին
ԱՄՆ նախագահ Ջո Բայդենի վարչակազմը Մեքսիկայի հետ սահմանին առաջացած ճգնաժամի ֆոնին մտադիր է անօրինական ներգաղթյալների երեխաների համար նոր կենտրոններ բացել: Այս մասին հայտարարել է Սպիտակ տան մամուլի քարտուղար Ջեն Փսակին, գրում է Reuters-ը։
«Մենք հայտարարել ենք նոր կենտրոնների բացման մասին, առաջիկա օրերին և շաբաթներին կհայտարարենք դրանց թվի ավելացման մասին»,- նշել է նա:
Փսակիի հաղորդմամբ՝ խոսքն այն վայրերի մասին է, որտեղ երեխաները հնարավորություն կունենան բուժօգնություն ստանալ:
Օրերս Բայդենը ներգաղթյալներին կոչ էր արել ապօրինի մուտք չգործել ԱՄՆ, այդ թվում՝ Մեքսիկայի տարածքից:
Սպիտակ տան ղեկավարը նշել էր, որ անօրինական ներգաղթյալների թվի աճը, մասնավորապես, նկատվել է 2019 և 2020 թվականներին: Բայդենը չէր համաձայնել այն պնդումների հետ, թե տեղի ունեցածն անօրինական ներգաղթյալների հանդեպ իր «չափազանց մեղմ մոտեցման հետևանքն է»:
ԱՄՆ նախագահն իրենց երկրները լքել և ապօրինաբար ԱՄՆ-ի սահմանը հատել պատրաստվող ներգաղթյալներին կոչ էր արել «մնալ իրենց երկրներում»։
Այս շաբաթ ԱՄՆ-ի ներքին անվտանգության նախարարությունը հայտնել է, որ երկիրը պետք է պատրաստ լինի վերջին երկու տասնամյակների ընթացքում Կենտրոնական Ամերիկայի պետություններից ռեկորդային թվով անօրինական ներգաղթյալների ժամանմանը։










