Առաջիկայում կունենանք պարենային անվտանգության լուրջ խնդիր, մասնավորապես հացահատիկի առումով ի՞նչ ենք անելու. Սոֆյա Հովսեփյանը՝ կառավարությանը (տեսանյութ)

17:30 • 24.03.21

Երկրում տեղի ունեցած իրավիճակներից ելնելով՝ բոլորս շատ լավ հասկանում ենք, որ առաջիկայում կունենանք պարենային անվտանգության լուրջ խնդիր, և այդ խնդիրները պայմանավորված են նաև հողային ռեսուրսների փոքրացմամբ: Այս մասին Ազգային ժողովում կառավարության հետ հարց ու պատասխանի ժամանակ ասաց Աժ պատգամավոր Սոֆյա Հովսեփյանը՝ դիմելով էկոնոմիկայի  նախարարին:

«Արդյոք կա՞ ռազմավարություն,  գյուղատնտեսական ի՞նչ ծրագրեր կիրականացվեն, որոնցով մեր պարենային անվտանգության հարցը լուծվի, կամ ծավալները մեծացվի: Մասնավորապես, հացահատիկի առումով ի՞նչ ենք անելու, քանի որ առաջնահերթ օղակից մեկը բերվող Արցախի հացահատիկն էր, որի հնարավորությունը այլևս չունենք»,-ասաց նա և հարցրեց նաև, թե արդյոք կան ծրագրեր, որոնց արդյունքում ոչ մի տեղ, մարզային որևէ հատվածում չենք ունենալու չմշակվող հողեր:

Չնայած Սոֆյա Հովսեփյանը հույս հայտնեց, որ հարցին ամբիոնից պատասխան կհնչի, բայց կառավարությունը առաջարկեց գրավոր ուղարկել հարցը: