Ներկայացրած ձևաչափով խնդրում ենք օրենքը չընդունել. ՊՆ փոխնախարարը՝ միջին մասնագիտական կրթական ծրագրով վերջին կուրսում սովորողներին տարկետում տալու մասին
Ազգային ժողովը քննարկեց «Զինվորական ծառայության եւ զինծառայողի կարգավիճակի մասին» ՀՀ օրենքում լրացում կատարելու մասին օրենքի նախագիծը, որը ներկայացրել է «Լուսավոր Հայաստան» խմբակցությունը: Նախագծով առաջարկում է, որ միջին մասնագիտական կրթական ծրագրով ուսումնառությունը չավարտած, ավարտական կուրսում սովորողներին կառավարության որոշմամբ մեկ անգամ տալ տարկետում, սակայն ոչ ավելի, քան նրա 20 տարին լրանալու օրը:
Զեկուցող Աննա Կոստանյանը նշեց, որ «Կրթության մասին» և «Նախնական մասնագիտական արհեստագործական և միջին մասնագիտական կրթության մասին» օրենքների կարգավորումների շրջանակներում օրենսդիրը նախնական մասնագիտական արհեստագործական և միջին մասնագիտական կրթական ծրագրերով ուսումնառությունը դիտարկել է միևնույն հարթակում՝ այդ ոլորտում պետության վրա նույնաբնույթ պարտավորություններ դնելով:
«Սակայն օրենքը չի սահմանել հավասար մոտեցում՝ նախնական մասնագիտական և միջին մասնագիտական կրթական ծրագրերով սովորող քաղաքացիների միջև: Եթե 19 տարին լրացած և նախնական մասնագիտական կամ արհեստագործական կրթական ծրագրով սովորող քաղաքացիների համար օրենքի 22-րդ հոդվածի 5-րդ մասում նախատեսված է մինչև ուսումնառության ավարտը ՀՀ կառավարության որոշմամբ մեկ անգամ տարկետում ստանալու հնարավորություն, ապա 19 տարին լրացած և միջին մասնագիտական կրթական ծրագրով սովորող քաղաքացիների համար այդ իրավունքը սահմանափակված է»,– ասաց նա:
Պաշտպանության նախարարի տեղակալ Արման Սարգսյանը ներկայացրեց նախագծի վերաբերյալ Պաշտպանության նախարարության և կառավարության դիրքորոշումը: «Ներկայացրած ձևաչափով խնդրում ենք օրենքը չընդունել և թողնել անփոփոխ, բայց ունենք պայմանավորվածություն և պատրաստակամ ենք այդ փոփոխության շրջանակներում, որը կլինի ավելի տրամաբանական, չի ազդի զորակոչի և այլ խնդիրների վրա և թույլ կտա հետագայում ենթարկել փոփոխության»,-ասաց նա:










