Կանադան AstraZeneca պատվաստանյութի պիտակի վրա կնախազգուշացնի թրոմբի առաջացման վտանգի մասին

12:49 • 25.03.21

Կանադայի առողջապահության նախարարությունը թարմացրել է բրիտանա-շվեդական AstraZeneca ընկերության արտադրած հակակորոնավիրուսային պատվաստանյութի ուղեցույցները և դրա պիտակի  վրա ներառել թրոմբի հնարավոր առաջացման մասին նախազգուշացում:

Այս մասին հաղորդվում է երկրի առողջապահության նախարարության կայքում:

«Առողջապահության նախարարությունը թարմացրել է հակակորոնավիրուսային AstraZeneca և Covishield պատվաստանյութերի նկարագրության բաժինը և պիտակը՝ դրանում ներառելով AstraZeneca պատվաստանյութի կողմնակի ազդեցության՝ շատ հազվադեպ հանդիպող թրոմբոցիտների առաջացման մասին նախազգուշացում»,- ասվում է հաղորդագրության մեջ:

Բացի այդ, գերատեսչությունը հայտնել է, որ առողջապահական ծառայություններ մատուցող անձանց և պատվաստանյութեր ստացողների համար պատվաստվելուց հետո հնարավոր ախտանիշները վերահսկելու ուղեցույց է թողարկել: Միևնույն ժամանակ, նախարարությունը շարունակում է պնդել  AstraZeneca-ի անվտանգության մասին և հորդորում է քաղաքացիներին պատվաստվել երկրում առկա դեղամիջոցներով: 

Ինչպես ավելի վաղ տեղեկացրել էր Tert.am-ը, Եվրամիության մի շարք երկրներ վերջերս դադարեցրել են AstraZeneca-ով պատվաստումները՝ դրանք ստացած մարդկանց մոտ առանձին դեպքերում թրոմբոցիտների քանակի պակասի և բարդացումների մասին ահազանգերի պատճառով։

Դեղամիջոցների եվրոպական գործակալության զեկույցի համաձայն՝ պատվաստանյութը կարող է կապված լինել արյան հյուսվածքներին առնչվող շատ հազվադեպ դեպքերի հետ: