«Սգում եմ սիրելի տատիկիս կորուստը»․ Բարաք Օբաման գրառում է արել 99-ամյա տատի մահվան առնչությամբ (լուսանկարներ)
ԱՄՆ նախկին նախագահ Բարաք Օբաման սոցցանցերոմ հարգել է օրերս մահացած խորթ տատի՝ Սառա Օբամայի հիշատակը, գրում է Daily Mail-ը։
«Իմ ընտանիքը և ես սգում ենք մեր սիրելի տատիկի կորուստը, որը շատերին հայտնի է որպես «Սառա մամա»»,- գրել է Օբաման։
Օբամայի խոսքով՝ երբ իր ընտանիքը դժվարություններ է ունեցել, անմիջապես ապավինել է նրա օգնությանը, քանի որ նրա ներկայությունը ուժ և եռանդ է հաղորդել։
«Երբ ես առաջին անգամ գնացի Քենիա, որպեսզի ավելի շատ բան իմանամ իմ ժառանգության և հորս մասին, հենց տատիկս էր, որ կամուրջ դարձավ դեպի անցյալ, և հենց նրա պատմություններն են օգնել լրացնել իմ սրտում եղած բացը»,- հավելել է նախկին նախագահը։
Նախօրեին հայտնի էր դարձել, որ Քենիայում 99 տարեկանում մահացել է Բարաք Օբամայի խորթ տատիկը։
Սառա Օբաման Բարաք Օբամայի հորական պապի երրորդ կինն է։ Չնայած նա ԱՄՆ-ի նախագահի արյունակից բարեկամուհին չէ, նախկին նախագահը միշտ ջերմությամբ է խոսել նրա մասին։
Քենիայի նախկին վարչապետ Ռաիլա Օդինգան Սառա Օբամային անվանել է «քենիացի կանանց տոկունության և ինքնավստահության խորհրդանիշ, որը, օգտվելով թոռան հաջողությունից, աջակցել է տարածաշրջանում աղջիկների ուսման և կրթության գործընթացին»։
Բարաք Օբաման ծնվել է 1961 թվականին՝ Հոնոլուլու քաղաքում և երբեք չի ապրել Քենիայում։ Նրա ծնողները՝ ամերիկուհի Սթենլի Էնն Դանհեմը և քենիացի Բարաք Հուսեյն Օբամա ավագը, բաժանվել են 1964 թվականին, որից հետո ապագա նախագահի հայրը վերադարձել է հայրենիք, որտեղ աշխատել է պետական ծառայությունում: Վերջինս մահացել է 1982 թվականին՝ ավտովթարից։














