Պատերազմի մասնակցած 1373 ուսանողի ուսման վարձը փոխհատուցվել է, կփոխհատուցվի ևս 2840 ուսանողի ուսման վարձ․ ԿԳՄՍ նախարար

11:51 • 01.04.21

Կփոխհատուցի Արցախյան վերջին պատերազմին մասնակցած 2840 շահառու ուսանողի ուսման վարձը։ Որոշումը կայացվեց Կառավարության այսօրվա նիստին։

«Կվճարվի 590 մլն դրամ։ Այստեղ ներառված են ինչպես բուհերի, այնպես էլ՝ քոլեջների շահառուները։ Գումարը բաշխված է հետևյալ կերպ՝ մոտ 82 տոկոսը պետական բուհերն ու քոլեջներն են, 18 տոկոսը՝ ոչ պետականները»,- ներկայացրեց ԿԳՄՍ նախարար Վահրամ Դումանյանը։

Նա հայտարարեց, որ այսօրվա դրությամբ պատերազմի մասնակից շահառուների համար արդեն իսկ փոխհատուցվել է, ընդհանուր առմամբ, 205 մլն դրամ։ «Շահառուների թիվը եղել է 1373»,-նշեց նա։

Նիկոլ Փաշինյանն էլ նշեց՝ այս ծրագրով պոտենցիալ շահառուների թիվը 7000 է, և ֆինանսանվորումը կշարունակվի այնքան, մինչև բոլոր 7000 շահառուների մեկ կիսամյակի ուսման վարձը փոխհատուցվի։