Քրդական ուժերը 62 000 հոգանոց ճամբարում իրականացված հակահաբեկչական գործողության արդյունքում ձերբակալել են ԻՊ 125 զինյալի, այդ թվում՝ 20 բջջի ղեկավարի

12:13 • 05.04.21

«Սիրիայի դեմոկրատական ուժեր» ընդդիմադիր խմբավորումը, որի կազմում մեծապես քրդեր են, հայտնել է, որ Սիրիայի հյուսիս-արևելքում գտնվող ճամբարում անցկացվող հակաահաբեկչական գործողության ընթացքում իրենց հաջողվել է ձերբակալել «Իսլամական պետություն» ահաբեկչական խմբավորմանը ենթադրաբար հարող 125 զինյալի:

Այս մասին գրում է sofrep.com-ը, նշելով՝ ընդարձակ վրանային ճամբարում բնակվել է 62 000 մարդ:

Նշվում է՝ ԱՄՆ-ի աջակցությամբ գործող «Սիրիայի դեմոկրատական ուժեր»-ը տևական ժամանակ է, ինչ փորձում է ազատել Սիրիայի հյուսիս-արևելքում գտնվող Ալ Հոլ ճամբարը «Իսլամական պետության» հավաքագրողներից: Խմբավորման ահաբեկիչները տարեսկզբից Ալ Հոլում մահապատժի են ենթարկել ավելի քան 40 մարդու: 

«Սիրիայի դեմոկրատական ուժեր»-ի հաղորդմամբ՝ գործողության առաջին փուլն ավարտված է: Քրդական զորքերը, որոնց թվաքանակը գերազանցում է 5000-ը, վրաններում որոնել են «Իսլամական պետության» անդամներին, որի արդյունքում ձերբակալվել է բջիջների 20 ղեկավար, որոնք պատասխանատու են եղել ճամբարի ներսում տեղի ունեցած սպանությունների համար:

Հիշեցնենք՝ Ալ Հոլը փախստականների համար նախատեսված ճամբար է, որը գտնվում է Սիրիայի հյուսիսային Ալ Հոլ քաղաքի հարավային ծայրամասում, Սիրիա-Իրաք սահմանին մոտ: Այստեղ բնակվում են Իրաքի և Լևանտի իսլամական պետությունից տեղահանված անձինք: