«Հավակոտ ծրագրեր իրականացնելու համար՝ հատկապես շինարարության ոլորտում, ներգաղթյալների պակաս ունենք»․ Պեսկով

16:06 • 08.04.21

Ռուսաստանի Դաշնության նախագահի մամուլի քարտուղար Դմիտրի Պեսկովն ասել է, որ երկիրը բավարար թվով ներգաղթյալներ չունի՝ հավակնոտ ծրագրեր իրականացնելու համար, հայտնում է ՏԱՍՍ լրատվական գործակալությունը։

Պատասխանելով ներգաղթյալների նկատմամբ ռուսների բացասական վերաբերմունքի աճի և դա որպես հավանական սպառնալիք տեսնելու մասին հարցին՝ Պեսկովն ասել է․ «Ճիշտն ասած, ես ծանոթ չեմ ներգաղթյալների նկատմամբ ռուսների վերաբերմունքի մասին սոցիոլոգիական հետազոտության արդյունքներին: Այնպես որ չեմ կարողանա մեկնաբանել և չեմ անի դա»:

Ապա Պեսկովը հավելել է, որ կարող է միայն նշել, որ փաստացի ներգաղթյալների թիվն անցյալ տարվա ընթացքում նվազել է։

«Մենք ներգաղթյալների պակաս ունենք հավակնոտ ծրագրեր իրականացնելու համար», - նշել է Պեսկովը և շեշտել, որ սա վերաբերվում է հատկապես շինարարական ոլորտին, որտեղ պետք է կառուցել ավելին, քան կառուցվում է։

Անդրադառնալով ներաղթյալների երեխաներին Պեսկովն ասել է․ «Իհարկե, Ռուսաստանը որպես պետություն, պետք է պայմաններ ապահովի ներգաղթյալների երեխաների համար, որպեսզի նրանք հարմարվեն ռուսական բազմազգ և բազմադավան հասարակությանը»։