Լատվիայի նախագահը ավտովթարի մասնակից է դարձել Ռիգայում

09:34 • 09.04.21

Լատվիայի նախագահ Էգիլս Լևիցը փոքրիկ ավտովթարի մասնակից է դարձել Ռիգայում: Վթարի արդյունքում ոչ ոք չի տուժել: Այս մասին տեղեկացնում է korrespondent.net կայքը` հղում տալով տեղի LETA գործակալությանը:

Հաղորդվում է, որ ընթացքի ժամանակ Լևիցի մեքենան կտրուկ արգելակել է, և դրան բախվել է նախագահի անվտանգության ամենագնացը:

Վթարի վայրում կողմերը պատահարի վերաբերյալ համաձայնեցված արձանագրություն են կազմել: Դրանից հետո մեքենաները շարունակել են իրենց ճանապարհը, իսկ վթարը չի ազդել պետության ղեկավարի օրակարգի վրա:

Վթարի մասին տեղեկությունը փոխանցվել է Լատվիայի պետական ոստիկանությանը: