Այս ընտրությունների նախաշեմին ես չեմ սատարելու որևէ ուժի՝ լինի իշխանամետ, թե իրապես ընդդիմադիր. Միքայել Մինասյան (տեսանյութ)

Սուրբ Աթոռում ՀՀ նախկին դեսպան Միքայել Մինասյանը հարցազրույց է տվել «Արմնյուզ» հեռուստաընկերությանը և հայտնել իր դիրքորոշումը առաջիկա հնարավոր արտահերթ ընտրությունների վերաբերյալ: Միքայել Մինասյանը հայտնել է, որ առաջիկա քաղաքական ընտրություններին չի սատարելու որևէ քաղաքական ուժի. «Այս ընտրությունների նախաշեմին ես չեմ սատարելու որևէ ուժի՝ լինի իշխանամետ, թե իրապես ընդդիմադիր»:

Միքայել Մինասյանը նախ հայտնում է, թե ինչու է ինքը դեմ եղել ընտրություններին և ինչու է Նիկոլ Փաշինյանը հայտարարել ընտրությունների մասին, և ինչու են ընտրությունները ամենաամոթալի ձևը Նիկոլ Փաշինյանի դեմ պայքարելու համար.

«Եկեք չմոռանանք, որ սա երկրորդ անգամ է, որ Նիկոլ Փաշինյանը խոսում է ընտրությունների մասին: Ինչ արեց նա. «Ընտրություն» օպերացիայով հետ բերեց բանակը ենթակայության տակ, և ինչու դա արեց, որովհետև բանակը 50 000-100 000 ձայն է, այդ թատրոնը և այդ թատրոնի ամեն մի խաղացող՝ բանակ, օպոզիցիա, իշխանություն եռանկյունու մասին, բոլորն ունեին իրենց շահերը, ընդդիմությունը ևս, որովհետև ընդդիմությունը զրկվել էր իմաստից»:

Միքայել Մինասյանի խոսքով՝ ընդդիմությունը միանգամից գնաց ու Բաղրամյան պողոտայում վրաններ շարեց, որովհետև Օնիկ Գասպարյանը ստեղծեց կոնտենտ. «Ու սկսվեց: Այստեղ գալիս է երկրորդ կտորը, թե Օնիկ Գասպարյանը ինչու դա արեց. նա իր վրայից մաքրեց ռազմական խայտառակ պարտության արյունը, բայց ես հարց եմ ուզում տալ կոնկրետ օպերացիայի մասին, ինչի մասին խոսել են գեներալներ. Լելե-Թեփեում ինչո՞ւ զոհվեցին տղաները և ո՞վ է կոնկրետ հրաման տվել: Եվ ես իրենց հարցեր ունեմ, իրենք մեկ պահանջում են Նիկոլ Փաշինյանի հրաժարականը, մեկ երկրորդ դասարանի երեխայի պես դիմացը կանգնած են, վերջը կարող ենք պայմանավորվել՝դուք սպա՞  եք, թե՞ ինչ եք:

Երրորդը. Նիկոլ Փաշինյանը հայտարարեց ընտրություններ, և մի վայրկյանում բոլորը երջանկացան: Մի բառով Նիկոլը վերադարձրեց բանակը, փողոցը վերադարձավ Նիկոլին, որովհետև Նիկոլը շատ լավ հասկանում է, որ ինքը այս ընտրություններում ձայն չունի, ինքը պետք է կեղծի»:

Սպասվող հնարավոր ընտրությունների վերաբերյալ քաղաքական գործիչ Սամվել Ֆարմանյանի դիտարկմանը Միքայել Մինասյանը պատասխանեց՝ իր վերաբերմունքն ընտրություններին շատ-շատ վատ է, խայտառակություն է, որ ՀՀ-ն Նիկոլ Փաշինյանի գլխավորությամբ գնում է ընտրությունների. «Եթե Նիկոլ Փաշինյան ընդդիմադիր գործիչն ունենար այս վիճակի 5 տոկոսը, ինքը արդեն Էրդողանին էլ էր գցել, Իրանից հասել էր Քուրդիստան»:

Հարցին՝ կարո՞ղ են ընտրությունները լինել սահմանադրական ճանապարհով իշխանափոխության հասնելու ելք, Միքայել Մինասյանը բացասական պատասխան տվեց:

Սամվել Ֆարմանյանի դիտարկմանը, թե Միքայել Մինասյանը բազմիցս խոսել է Նիկոլ Փաշինյանին իշխանությունից հեռացնելու մասին, և հարցին՝ կարո՞ղ են ընտրություններն այդ առիթը լինել, Միքայել Մինասյանը պատասխանեց. «Ես հայտարարում եմ պաշտոնապես, որ ես երբեք այս ընտրությունների նախաշեմին չեմ սատարելու որևէ ուժի՝ լինի դա իշխանամետ, իսկ դրանք շատ են, միայն «Իմ քայլը» չի, Նիկոլ Փաշինյանը իշխանամետ ընդդիմադիրների բանակ ունի, լինի՝ իրապես ընդդիմադիր: Իմ ոչ մի ընկեր, համախոհ չի լինելու ոչ ոքի ցուցակում, եթե նա ինչ-որ մեկի ցուցակում է, ապա նա ոչ իմ ընկերն է, բառի լայն իմաստով, ոչ իմ համախոհը: Եթե ես որոշեմ մասնակցել այս ընտրություններին, ապա ես դա անելու եմ իմ դեմքով, իմ ընկերների ու այն մարդկանց հետ, որոնց համար ես կրելու եմ ուղիղ պատասխանատվություն, և այո, ես հեռացնելու եմ Նիկոլ Փաշինյանին  իշխանությունից: Բացի որ հեռացնելու եմ, պատժելու եմ Նիկոլ Փաշինյանին, և ապացուցելու եմ աշխարհին, որ Նիկոլ Փաշինյանը հայ ժողովրդի թշնամին է, դավաճան ու մարդասպան: Երկրորդը, ընտրությունները հնարավորություն են բոլորիս համար ցույց տալու, թե ով ով է»:

Միքայել Մինասյանը հայտնեց, որ որևէ քաղաքական ուժի մաս չի կազմելու, և հարցին՝ այդ թվում նաև ՀՀ երկրորդ նախագահ Ռոբերտ Քոչարյանի՞, ՀՀ երրորդ նախագահ Սերժ Սարգսյանի ղեկավարած ուժերի՞, որոնք հնարավոր է մասնակցեն, կամ չէ, Միքայել Մինասյանն ասաց. «Նախ, ես որքանով տեղյակ եմ, Սերժ Սարգսյանն ու ՀՀԿ-ն չեն մասնակցելու ընտրություններին, առաջին նախագահը նույնպես, իսկ երկրորդ նախագահը հայտարարել է, որ մասնակցելու է ընտրություններին և հաղթելու է, ես շատ եմ ուզում, որ իր մոտ ստացվի, ես չեմ մասնակցելու այդ ընտրություններին այդ թիմի կազմում»:

Միքայել Մինասյանն անդրադարձել է նաև անցյալին ու ապագայի իր տեսլականին, և հայտնել, որ անցյալի հետ հաշտվելու մեկ ճանապարհ կա՝ ընդունել անցյալը. «Ես անձամբ ինձ անցյալում չեմ պատկերացնում, ինձ պատկերացնում եմ ամեն տեղ՝ բանտում, գերեզմանափոսում, որտեղ այսօր բոլորս ենք հիմա, բայց ես ինձ չեմ պատկերացնում գաղթի մեջ՝ խայտառակված որպես ՀՀ քաղաքացի, և ինձ չեմ պատկերացնում անցյալում։ Հետևաբար ես կռվելու եմ հանուն ապագայի։ Միակ պատճառը, որի համար կուզենայի, ուզում եմ մասնակցել այս ընտրություններին, որ մարդկանց տամ այլընտրանք, որ մարդկանց հնարավորություն տամ չընտրելու անցյալի ու անցյալի մեջ, մարդկանց համոզելու, որ կա ևս մեկ տարբերակ, դա ապագան է։ Կգտնե՞մ իմ մեջ այդքան ուժ, անկեղծ եմ ասում, դժվար է դա, որովհետև հասկանում եմ, որ այդ պահից չունեմ վերադարձի տարբերակ, բայց եթե հանկարծ ես իմ մեջ գտնեմ այդ ուժը, գնալու եմ մինչև վերջ, եթե նույնիսկ մարդկանց 97 տոկոսը ընտրի անցյալը, 3 տոկոսի հիման վրա մենք կկառուցենք նոր երկիր»:

Անդրադառնալով քաղաքական կենտրոններին ու տարածաշրջանային զարգացումներին՝ Միքայել Մինասյանն ասաց, որ Մոսկվային հիմա այլընտրանք չկա, բայց ինքը արժանապատիվ եղբայրության կողմնակից է. «Ես արժանապատիվ եղբայրության կողմնակից եմ։ Դա էլ է աշխատանք, դա էլ է դիվանագիտություն։ Մենք այսօր պետք է հետ բերենք մեր լավ ելակետային դիրքերն առաջին հերթին Մոսկվայում»:

Սամվել Ֆարմանյանի հարցին՝ այսքանից հետո դա հնարավո՞ր է, Միքայել Մինասյանը դրական պատասխան տվեց․ «Միանշանակ, ՀՀ և ՌԴ շահերը 90 տոկոսով համընկնում են։ Ես խոսում եմ այսօրվա մասին, չգիտեմ ինչ կլինի 5 տարի հետո, բայց դա էլ արդեն դիվանագիտության արվեստ է, պրոֆեսիոնալիզմ է»:

Հանձնված տարածքների վերաբերյալ Միքայել Մինասյան ասաց՝ Հայաստանը նոր պատերազմի ռեսուրս չունի, խնդիրներ կան նաև Ադրբեջանում, բայց և պնդեց, որ առանց պատերազմի հնարավոր է փորձել հետ բերել Հադրութն ու Շուշին:

Առավել մանրամասն՝ տեսանյութում: