Johnson & Johnson պատվաստանյութի կիրառումից հետո գրանցվել են թրոմբոզի առաջացման դեպքեր. ԵՄ-ն ստուգումներ է սկսում

09:44 • 10.04.21

Եվրոպական դեղերի գործակալությունը (EMA) կվերանայի տեղեկատվությունը Johnson & Johnson ընկերության մշակած հակակորոնավիրուսային պատվաստանյութի հավանական ծանր կողմնակի ազդեցությունների մասին, նախքան դեղամիջոցի՝ Եվրամիությունում լայնամասշտաբ կիրառումը:

Այս մասին գրում է Deutsche Welle-ն՝ վկայակոչելով գործակալության հայտարարությունը:

Նշվում է՝ խոսքը պատվաստումներից հետո թրոմբոզի առաջացման մասին է: Ամերիկյան Johnson & Johnson դեղագործական ընկերության պատվաստանյութը Եվրահանձնաժողովը հաստատել է այս տարվա մարտին: 

J&J պատվաստանյութի կողմնակի ազդեցությունների մասին զեկուցվել են ԱՄՆ-ում

Ավելի վաղ՝ ապրիլի 8-ին, հաղորդվել էր, որ ԱՄՆ Հյուսիսային Կարոլինա նահանգում COVID-19 պատվաստումների կենտրոնը ժամանակավորապես փակվել է այն բանից հետո, երբ մի քանի մարդկանց մոտ առաջացել են կողմնակի բարդություններ J&J պատվաստանյութով պատվաստվելուց հետո: Մեկ օր առաջ նմանատիպ դեպք էր գրանցվել Դենվեր քաղաքում, որտեղ այս դեղամիջոցի պատվաստումից հետո հիվանդները բողոքել են գլխապտույտից և սրտխառնոցից:

J&J պատվաստանյութի առավելությունները

Ի տարբերություն այլ պատվաստանյութերի՝ J&J պատվաստանյութը պահանջում է ընդամենը մեկ ներարկում, որը հնարավորություն է տալիս շատ մարդկանց օգտվել դեղամիջոցից: Բացի այդ, J&J պատվաստանյութը պահեստավորման և տեղափոխման համար չի պահանջում ծայրահեղ ցածր ջերմաստիճան: Բրիտանա-շվեդական AstraZeneca և ռուսական «Սպուտնիկ V» պատվաստանյութերի նման, J&J-ն ևս համարվում է վեկտորային պատվաստանյութ:

ԱՄՆ-ի սննդի և դեղերի վարչությունը (FDA) 2021 թվականի փետրվարին գրանցել էր J&J պատվաստանյութը: 3-րդ փուլի կլինիկական փորձարկման արդյունքները ցույց են տալիս, որ պատվաստումից չորս շաբաթ անց անձանց մոտ 66%-ով նվազում է միջինից ծանր ընթացքով կորոնավիրուսով հիվանդացության ռիսկը: