Ինձ թեկնածուի մեջ գոհացրեց անկեղծությունը, կարող էր չէ՞ ինչ-որ առումով շրջանցել հարցը. Արտակ Մանուկյանը՝ ՀԾԿՀ անդամի թեկնածուի մասին (տեսանյութ)
«Իմ քայլը» խմբակցության պատգամավոր Արտակ Մանուկյանը, իր ելույթում անդրադառնալով Հանրային ծառայությունները կարգավորող հանձնաժողովի անդամի թեկնածու Լևոն Բունաթյանին, նախ խոսեց ՀԾԿՀ գործառույթներից և նշեց՝ սակագների նվազումը կախված է իրավիճակներից:
Թեկնածուի վերաբերյալ նա նշեց. «Կարծում եմ, որ առաջադրելու համար կան շատ չափորոշիչներ, ինձ թեկնածու մեջ գոհացրեց անկեղծությունը, այդ մարդը անկեղծ գալիս ասում էր՝ ես չեմ կարդացել, կարող էր չէ՞ ինչ-որ առումով շրջանցել, և ասել՝ կարդացել եմ, և փորձեր ձևակերպումներ անել»:
Չնայած դրան՝ Արտակ Մանուկյանն ասաց, որ կարծում է՝ անկեղծությունը անհրաժեշտ, բայց ոչ բավարար գործոն է: «Պարոն Բունաթյան, երբ գալիս եք ամբիոնի մոտ, կարող եք ինչ-որ բան չիմանալ: Չիմանալն ամոթ չէ, բայց ամոթ է իմանալ չցանկանալը: Չիմանալ ռազմավարական ծրագիրը, չունենալ բարեփոխումների փաթեթ, տեսլական, ինձ համար անընդունելի է որպես ԱԺ պատգամավոր: Եթե չկա սովորելու ցանկություն, ապա կամայական բարի մղումներով և անկեղծ նպատակներով համակարգը փոխելն այդքան արդյունավետ չի լինի»,-ասաց պատգամավորը և հույս հայտնեց, որ հաջորդ թեկնածուն կլինի անկեղծ, բայց կլինի սովորելու ցանկություն ունեցող:










