ԵՄ-ն չի երկարաձգի AstraZeneca-ի և Johnson & Johnson-ի հետ կնքված պայմանագրերի ժամկետները. La Stampa

17:10 • 14.04.21

AstraZeneca և Johnson & Johnson ընկերությունների մշակած հակակորոնավիրուսային պատվաստանյութերը չեն գնվի Եվրամիության բնակիչներին պատվաստելու համար՝ դրանց գործող պայմանագրերի ժամկետի ավարտից հետո:

Համապատասխան որոշումն ընդունել է Եվրահանձնաժողովը, գրում է Reuters-ը՝ հղում կատարելով իտալական La Stampa թերթին:

Նշվում է, որ Եվրահանձնաժողովը, համաձայնելով ԵՄ երկրների ղեկավարների հետ, որոշում է կայացրել. պատվաստանյութեր արտադրող ընկերությունների հետ կնքված և արդեն գործող պայմանագրերը սահմանված ժամկետից հետո չեն երկարաձգվի:

Միևնույն ժամանակ, Բրյուսելը մտադիր է կենտրոնանալ Pfizer և Moderna պատվաստանյութերի վրա:

Բացի այդ, ԵՄ խոսնակը Reuters-ին ասել է՝ Եվրահանձնաժողովը J&J ընկերությունից պարզաբանում է պահանջել ԵՄ-ին դեղորայքի մատակարարման հետաձգման մասին «բոլորովին անսպասելի» հայտարարության վերաբերյալ:

Ավելի վաղ եվրոպական կարգավորիչը թրոմբոզը ճանաչել էր որպես AstraZeneca պատվաստանյութի հազվադեպ հանդիպող կողմնակի ազդեցություն: Այս պահին տարբեր երկրներում հայտնի են տասնյակ դեպքեր, երբ պատվաստանյութից հետո մարդիկ հոսպիտալացվել կամ մահացել են:

Հիշեցնենք, որ մի քանի օր առաջ Johnson & Johnson-ը Եվրոպա էր ուղարկել սեփական արտադրության հակակորոնավիրուսային պատվաստանյութի առաջին խմբաքանակը: