Իմ երկու խորհրդականներն էլ պատերազմի ընթացում խոհուրդ են տվել Զինված ուժերում իրականացնել շատ կտրուկ պաշտոնանկություններ. Նիկոլ Փաշինյան

17:58 • 14.04.21

Այսօր Ազգային ժողովում կառավարության հետ հարցուպատասխանի ժամանակ «Լուսավոր Հայաստան» խմբակցության քարտուղար Գևորգ Գորգիսյանը մեջբերեց Նիկոլ Փաշինյանի խոսքերը, որ օգոստոսի 21-ին գլխավոր շտաբի պետը սխալ ինֆորմացիա է տվել, սխալ բան է զեկուցել:

«Դուք այն ժամանակ երկու խորհրդական ունեիք, երկուսն էլ անվտանգության ոլորտի բավականին փորձով, իրենց հետ քննարկվե՞լ է գլխավոր շտաբի զեկույցը, և ի՞նչ են խոհուրդ տվել, թողե՞լ են, որ ձեզ խաբեն, թե՞ իրենք էլ են աջակցել գլխավոր շտաբի պետի զեկույցին»,-հարցրեց պատգամավորը:

Նիկոլ Փաշինյանը, պատասխանելով հարցին, ասաց, որ այդ թեմայով քննարկումներ ունեցել են և այդ ժամանակ իր խորհրդական և ներկայիս պաշտպանության նախարար Վաղարշակ Հարությանը արտահայտել է իր դիրքորոշումները, որոնք գաղտնագրված տեղեկություններ են և կքննարկեն նպատակահարմարությունը նաև այդ տեղեկատվությունը գաղտնազերծելու, և եթե տեսնեն, որ դրանից պետական շահերը չեն տուժում, կներկայացվի:

Գևորգ Գորգիսյանը նկատեց, որ իր  խորհրդականներից  մեկը պաշտպանության նախարարն է, մյուսը վերջերս նշանակվեց գլխավոր շտաբի պետի առաջին տեղակալը: «Հետաքրքիր է իմանալ, թե ինչ խորհուրդներ են տվել և եթե իրենք սխալ զեկույցի կողմնակից են եղել, ապա ինչու են նշանակվել այս կարևոր պաշտոններին, եթե նրանք դեմ են արտահայտվել, ապա ինչու դուք չեք լսել ձեր խորհրդականներին: Այստեղ երկու տարբերակ կա, կամ ձեր խորհրդականները թույլ են տվել, որ ձեզ խաբեն, կամ ձեր խորհրդականները խորհուրդ են տվել և դուք չեք լսել ու գնացել եք արկածախնդրության»,-ասաց նա:

Նիկոլ Փաշինյանը նշեց, որ երկու խորհրդականներն էլ պատերազմի ընթացում խորհուրդ են տվել Զինված ուժերում իրականացնել շատ կտրուկ պաշտոնանկություններ: «Ես չեմ կարող ասել ,որ ափսոսում եմ, որ չեմ հետևել իրենց խորհրդին, քանի որ պատերազմական այդ իրավիճակում կտրուկ պաշտոնանկություններ անելն արդյոք կփոխեր իրավիճակը: Ես վստահ չեմ, որ նոր նշանակված պաշտոնյաները այդ խելահեղ իրավիճակում կհասցնեին իրավիճակն առնել տիրապետության տակ: Ես չեմ կարող ասել, որ զղջում եմ, քանի որ գրեթե վստահ եմ, որ դա կարելի էր անել, բայց նոր նշանակվածները ուղղակի կհայտնվեին մի հեղեղի մեջ, որին, մեծ հավանականությամբ, չէին տիրապետի»,-ասաց նա: