Եկել այստեղ, խոսում եք Հայաստանի ապագայից, ի՞նչ ապագայի մասին ենք խոսում, երբ Դուք այդ ապագայի վրա մի մեծ գերեզմանաքար եք դրել. Անի Սամսոնյանը՝ Նիկոլ Փաշինյանին (տեսանյութ)
Դուք փորձել եք զրոյական կետից սկսել բանակցությունները, գիտեիք, որ նախապատերազմական վիճակում է երկիրը, բայց Ձեր, Ձեր իշխանական խմբակցության, կառավարության անդամների վարքագիծը չի համապատասխանել պատերազմի շեմին կանգնած ղեկավարի վարքագծին: Այս մասին Ազգային ժողովում Նիկոլ Փաշինյանի հետ հարցուպատասխանի ժամանակ ասաց «Լուսավոր Հայաստան» խմբակցության պատգամավոր Անի Սամսոնյանը:
«Դուք երեք տարի այստեղ հանդես եք եկել պոպուլիստական բարեփոխումների մասին հայտարարություններով, որևէ հիմնարար բարեփոխում չի եղել, և մենք փաստորեն երեք տարի պատերազմի շեմին այստեղ չգիտեմ ինչով ենք զբաղվել, Դուք նախկինների հետ եք թուր ու թվանք տվել, կռվել, տուն-տունիկ խաղացել»,-ասաց պատգամավորը:
Նիկոլ Փաշինյանը, արձագանքելով նշեց, որ նիստի այս հատվածը կոչվում է հարց ու պատասխան: «Հայոց լեզվի քերականական կանոնների համաձայն՝ հարց է կոչվում այն նախադասություն, որի մեջ կա հարցական նշանով ձևակերպում: Քանի որ Ձեր խոսքում ոչ մի հարց չկա, ելույթ ունեցաք, Ձեր իրավունքն է, ես հարկ չեմ համարում արձագանքել Ձեր ելույթին»,-ասաց նա:
Անի Սամսոնյանը նկատեց, որ Նիկոլ Փաշինյանը նպատակադրված ոչ մի հարցի չի պատասխանելու, բայց, ըստ նրա, հարցն այն է, թե ինչ է արել նա, որ մարդիկ չկանգնեին այդ խնդիրների առաջ: «Փաստորեն՝ խաղաղասիրություն եք քարոզել, բթացրել եք մեր զգոնությունը, բայց մենք պատերազմի առջև՞ էինք: Դուք ոչ մի բան չեք արել, բայց եկել, այստեղ խոսում եք Հայաստանի ապագայից, ի՞նչ ապագայի մասին ենք այստեղ խոսում, երբ Դուք այդ ապագայի վրա մի հատ մեծ գերեզմանաքար եք դրել»,-ասաց նա:
Անի Սամսոնյանը, անդրադառնալով հետախուզական արբանյակներին, Փաշինյանին ասաց, որ նրան տեղյակ են պահել, որ դա անհրաժեշտ է, իսկ ԲՏԱ նախարարն ասել է՝ մեզ պետք չէ:
Նիկոլ Փաշինյանը նշեց, որ բարձրաձայնած տեղեկությունը չի համապատասխանում իրականությանը, և Հայաստանը զբաղվում է արբանյակ ունենալու գործով և շարունակում է զբաղվել: «Դա երեք օրվա գործ չէ, բարդ գործ է, քանի որ մենք ուզում ենք, որ արբանյակ ունենանք, իսկ տասնյակ ուժեր ուզում են, որ չունենանք, էլ չեմ ասում, որ բազմաթիվ հարցեր պետք է լուծենք»,-ասաց նա:










