Եթե պատերազմում վիրավորվածը 3 օրվա փոխարեն 2 օր է ստացիոնար բուժում ստացել և նորից գնացել առաջնագիծ, 500 000 աջակցությունից չի օգտվում․ հայրենասիրությունը ստորադասվում է․ պատգամավորը՝ փոխվարչապետին

11:02 • 15.04.21

Պատերազմում վիրավորված քաղաքացիներին աջակցություն տրամադրելու հարցում կան մի շարք խնդիրներ։ Այս մասին ԱԺ նիստի ընթացքում դիմելով ՀՀ փոխվարչապետ Մհեր Գրիգորյանին՝ հայտարարեց «Լուսավոր Հայաստան» խմբակցության պատգամավոր Սրբուհի Գրիգորյանը։

«Քաղաքացին պատերազմում վիրավորում է ստացել, երկու օր ստացիոնար բուժվել է, հայրենասիրությունից դրդված՝ չի շարունակել բուժումը և մեկնել ռազմաճակատ։ Ինչ-որ չափանիշ է սահմանված, որ 3 և ավելի օր ստացիոնար բուժում ստացողները աջակցություններից օգտվում են, իսկ այն քաղաքացիները, որոնք չեն սպասել բուժման ավարտին, դուրս են մնում ծրագրերից։ Ստացվում է՝ հայրենասիրությունը ստորադասվում է ինչ-որ առումներով։ Խնդում եմ այլ մեխանիզմներ մշակել, որ այդ քաղաքացիները նույնպես կարողանան օգտվել 500 հազար դրամի աջակցությունից»,-ներկայացրեց պատգամավորը։

ՀՀ փոխվարչապետ Մհեր Գրիգորյանը հորդորեց նման ցանկացած դեպքի վերաբերյալ տեղեկացնել Կառավարությանը։

«Բարդ հարց եք բարձրացնում, որը վերաբերում է շահառուների նույնականացման կանոններին, բայց կան բաղադրիչներ, որոնց գնահատականը պետք է տրվի առանձին։ Պատկերացնու՞մ եք՝ 3 օրվա փոխարեն դնենք, օրինակ, 1 օր, կամ ընդհանարապես պահանջ չդնենք ստացիոնար բուժման, մենք կունենանք շահառուների անկառավարելի շրջանակ և ի վիճակի չենք լինի այդ միջոցառումն իրականացնել ո՛չ ֆինանսական, ո՛չ կազմակերպչական իմաստով։ Այդ դեպքում տեղի կունենան հետևյալը՝ ցանկացած անձ, որը կունենան վնասվածք, կհանդիսանա նաև շահառու»,-ասաց նա։

Պատգամավորն արձագանքեց՝ եղել են դեպքեր, որ քաղաքացին, օրինակ, ոտքի թեթև վնասվածք է ստացել ու 3 և ավելի օր ստացիոնար բուժվել, հետևաբար արդեն որոշ դեպքերում անարդարություն կա, հետևաբար պատգամավորն առաջարկեց առաջնորդվել ոչ թե ստացիոնար բուժման օրերով, այլ վիրավորման ծանրությամբ։