Սիրիայի խորհրդարանը հայտնել է, թե երբ կանցկացվեն նախագահական ընտրությունները

16:41 • 18.04.21

Սիրիայում նախագահական ընտրությունները կկայանան մայիսի 26-ին: Ինչպես հայտնում է ՏԱՍՍ գործակալությունը՝ հղում անելով ՍԱՆԱ սիրիական պետական լրատվամիջոցին, այս մասին կիրակի հայտարարել է երկրի Ազգային խորհրդի (խորհրդարան) նախագահ Համմուդ Սաբաղը:

«Թեկնածուների առաջադրման համար փաստաթղթերի ընդունումը Գերագույն սահմանադրական դատարանում կմեկնարկի ապրիլի 19-ին և կտևի 10 օր՝ մինչև ապրիլի 28-ը»,- հայտնել է գործիչը:

Նրա խոսքով՝ ժողովրդի կամարտահայտումը տեղի կունենա երկրի համար ճակատագրական պահի: «Երբ մեր բանակը մարտադաշտում դիմակայում է ահաբեկիչներին, յուրաքանչյուր քաղաքացու պարտքն է օգտվել իր սահմանադրական իրավունքից և մասնակցել ընտրություններին՝ Սիրիայի դեմ ուղղված դավադրությունները խափանելու համար»,- հավելել է Սաբաղը:

Սիրիայում նախագահական նախորդ ընտրությունները կայացել են 2014 թվականին: Ընտրությանը մասնակցել էր քաղաքացիների 73.5 տոկոսը: