Թուրքական կուսակցությունը ԱՄՆ-ին կոչ է արել Ղրիմը ռուսական ճանաչել 

01:31 • 27.04.21

Անկարայում «Վաթան» («Հայրենիք») կուսակցության ներկայացուցիչները ամերիկյան դեսպանատան առջև կազմակերպված ցույցի ժամանակ առաջարկել են Ղրիմը ռուսական ճանաչել՝ ի պատասխան ԱՄՆ նախագահ  Ջո Բայդենի կողմից Օսմանյան կայսրությունում Հայոց ցեղասպանության ճանաչմանը: Այս մասին գրում է RT-ն:

Երկրի կառավարությանն ուղղված կուսակցության դիմումում, որը ընթերցել է քաղաքական ուժի գլխավոր քարտուղար Օզգուր Բուրսալին, նշվում է, որ անհրաժեշտ է միջոցներ ձեռնարկել ի պատասխան «Բայդենի հարձակման»:

Կուսակցությունը կոչ է արել 15 օրվա ընթացքում հեռացնել ամերիկացի զինվորականներին Թուրքիայից:

«Ղրիմը և Աբխազիան, ինչպես նաև Հյուսիսային Կիպրոսի (ինքնահռչակ) Թուրքական հանրապետությունը ճանաչելու համար պետք է դիվանագիտական շփումներ սկսվեն Ռուսաստանի, Իրանի և Ադրբեջանի հետ», - նշվում է դիմումի մեջ:

Ապրիլի 24-ին Սպիտակ տունը հրապարակել էր Բայդենի պաշտոնական հայտարարությունը Օսմանյան կայսրությունում Հայոց ցեղասպանության վերաբերյալ:

2020-ի հունիսին «Վաթան» կուսակցությունը ներկայացրել էր Սևծովյան-Միջերկրածովյան բարեկամության և խաղաղության ծրագիր, որն իր մեջ ներառում է Ղրիմի ճանաչումը որպես ռուսական:

Ղրիմը դարձավ Ռուսաստանի մարզ 2014 թվականի մարտին անցկացված հանրաքվեից հետո, երբ բնակիչների մեծ մասը կողմ էր քվեարկել Ռուսաստանի հետ վերամիավորմանը: