Դատախազության կայքի տեղը շատ լավ գիտեմ, ուզում էի, որ նախագծի հիմնավորումը լինի հանրային. Թագուհի Թովմասյանը՝ Վահագն Հովակիմյանին (տեսանյութ)
Այսօր, երբ Ազգային ժողովում քննարկվում էր ընտրական գործընթացներին խոչընդոտելու համար քրեական պատասխանատվության հարցը, անկախ պատգամավոր Թագուհի Թովմասյանը հարց բարձրացրեց, թե քարոզարշավի խոչընդոտման, տեղամասերի առաջ բռնության փորձերի և նման դեպքերով պայմանավորված դրույթներում նախատեսված պատիժների խստացումը ինչ նպատակ է հետապնդում:
Հարցի զեկուցող «Իմ քայլը» խմբակցության պատգամավոր Վահագն Հովակիմյանն ասաց, որ կա դրա մասին Գլխավոր դատախազության հաշվետվություն: «Ես չեմ կարծում, որ օրենսդրությունը պետք է բարելավենք վիճակագրական թվերով պայմանավորված»,- ասաց նա և նշեց, որ եթե չկանխենք, դա կարող է դառնալ համատարած:
Արձագանքելով՝ Թագուհի Թովմասյանը նշեց, որ Գլխավոր դատախազության հաղորդագրությունների տեղը գիտի, պարզապես ուզում է հիմնավորումը լինի հանրային, որ հասկանանք, թե որքանով է դա ռիսկային: «Մեկ–երկու դեպքերի համար փոփոխություններ անելը որքանո՞վ է նպատակահարմար, ո՞րն է ռիսկը, ես սա էի ուզում ամբիոնից հնչեցնեք, իսկ Դատախազության կայքի տեղը շատ լավ գիտեմ»,-ասաց նա:
Վահագն Հովակիմյանը պատասխանեց, որ ընտրախախտումները պետք է բացառվեն, պետք է իսկ ընտրախախտումն անողները պատասխանատվության ենթարկվեն: «Մեր խնդիրն է օրենսդրությունը բարելավել և թույլ չտալ, որ նույնիսկ մեկ դեպք լինի»,-հավելեց նա:










