Այս գործը պետք է գլխիվայր շուռ գա և մեղադրանք առաջադրվի պետական այն պաշտոնյաներին, որոնք երկրում ստեղծել են այս վիճակը. Արծվիկ Մինասյան (տեսանյութ)
Հարցաքննության ժամանակ մեզ փորձեցին ներգրավել որպես վկա, այս մասին լրագրողների հետ զրույցում ասաց ՀՅԴ ԳՄ անդամ Արծվիկ Մինասյանը՝ անդրադառնալով ՀՅԴ-ականներին քննչական կոմիտե հրավիրելուն:
«Ակնհայտ է, որ փորձում են հարցաքննել այն դեպքերի հետ կապված, որոնք տեղի են ունեցել դատախազության դիմաց, գնահատել եմ, որ դա քրեական հետապնդման քողի տակ իրականացվող քաղաքական հետապնդում է և օգտվելով սահմանադրական՝ ինձ ընձեռված հնարավորությունից՝ լռելու իրավունքից, հրաժարվել եմ ցուցմունք տալուց»,-ասաց նա:
Ըստ Արծվիկ Մինասյանի գնահատականի՝ այս գործը հեռանկար չի կարող ունենալ, որովհետև արհեստական է: «Այնքան ակնհայտ քաղաքական ենթատեքստ ունի իր մեջ, և ոչ միայն ապագա չունի, այլ նաև այս գործը պետք է գլխիվայր շուռ գա և մեղադրանք առաջադրվ այն պետական պաշտոնյաներին, որոնք իրենց անգործության, հանցավոր անփութության, հանցավոր անտարբերությամբ ստեղծել են այս վիճակը երկրում՝ սկսած դատախազությունից ավարտած քննչական մարմիններից»,- ասաց նա և նշեց, որ նրանք պարտավոր են քրեական գործեր հարուցել այն պաշտոնատար անձանց նկատմամբ, որոնք երկիր են հանձնել:
Նշենք, որ փոխվել է նաև դաշնակցական Գերասիմ Վարդանյանի կարգավիճակը, որը Երևանի քննչական վարչություն էր հրավիրվել հարցաքննության` կասկածյալի կարգավիճակով․ նրան տրվել է վկայի կարգավիճակ: «Տարօրինակ կերպով կարգավիճակս կասկածյալից փոխել էին վկայի: Քննիչը պատճառաբանեց, որ կասկածյալի կարգավիճակը տեխնիկական վրիպում է եղել: Չգիտեմ՝ ինչ է փոխվել մի քանի ժամվա ընթացքում, որ կասկածյալից վկայի վերածվեցի»,- ասաց նա և նշեց, որ հրաժարվել է ցուցմունք, բացատրություն տալ: «Հիմնավոր կասկածներ ունեմ, որ ցուցմունքը կարող է իմ դեմ օգտագործվել հնարավոր հարուցվելիք քրեական գործերի շրջանակում», - ասաց նա:
Մանրամասները տեսանյութում։










