ՊՆ–ն նախատեսում է բանակի հրամկազմի համար պրակտիկա անցնելու հնարավորություն ստեղծել տարբեր պետությունների զորամասերում․ Վաղարշակ Հարությունյան (տեսանյութ)

ԱԺ «Լուսավոր Հայաստան» խմբակցության անդամ Հարություն Բաբայանն այսօր Կառավարության հետ հարց ու պատասխանի ժամանակ պաշտպանության նախարարի ժամանակավոր պաշտոնակատար Վաղարշակ Հարությունյանից հետաքրքրվեց, թե ինչպես  է լինելու բանակի մոդեռնիզացիան, Վազգեն Սարգսյան ուսումնական կենտրոնին ինչպես է անդրադառնալու։

Վաղարշակ Հարությունյանը նշեց, որ Պաշտպանության նախարարությունը նախատեսում է բանակի հրամանատարական կազմի համար պրակտիկա անցնելու հնարավորություն ստեղծել տարբեր պետությունների զորամասերում:  

«Մենք խնդիր ունենք համապատասխանեցնել այսօրվա բանակը ժամանակակից իրավիճակին: Պետք է այսօրվա հրամկազմն անցնի տարբեր պետությունների զորամասերում պրակտիկա, որպեսզի ռազմավարական օղակի սպայակազմն ունենա գիտելիքներ, որոնք օգտագործվում են տարբեր պետություններում»,- ասաց Վաղարշակ Հարությունյանը։

Նա նշեց, որ նախատեսվում է թարմացնել նաև ռազմական համալսարանների պրոֆեսորադասախոսական կազմը, ինչպես նաև կուրսանտներին սովորեցնել օգտվել ժամանակակից սպառազինությունից: «Ռուսաստանի հետ կա պայմանավորվածություն, ըստ որի, ՌԴ-ն պատրաստ է վերապատրաստման համար ընդունել անսահմանափակ թվով զինվորականների»,–ասաց նա։

Ինչ վերաբերում է ուսումնառությանը, ապա պաշտպանության նախարարի պաշտոնակատարը  համաձայնեց, որ խնդիր կա բարձրացնել այս ոլորտում ուսման գրավչությունը, և դա պետական խնդիր է։