Ամեն ինչ պետք է անենք, որ հովիվը չգնա այդտեղ, մարդիկ չմոտենան ադրբեջանցիների դիրքերին. Վաղարշակ Հարությունյանը՝ ադրբեջանցի զինվորականների կողմից հայ հովվի բռնության ենթարկվելու մասին (տեսանյութ)

Սյունիքի մարզի Արավուս համայնքում միջադեպ էր տեղի ունեցել, երբ ադրբեջանցի երեք զինվորներ բռնության էին ենթարկել մեր քաղաքացուն: Պարզաբանեք՝ ի՞նչ է սա, ի՞նչ հետևանք է ունենալու և ի՞նչ է արվում, որպեսզի բացառվեն այսպիսի դեպքերը: Այս մասին այսօր ԱԺ-ում Կառավարության հետ հարցուպատասխանի ժամանակ ՀՀ պաշտպանության նախարարի ժամանակավոր պաշտոնակատար Վաղարշակ Հարությունյանին հարց ուղղելով՝ ասաց «Լուսավոր Հայաստան» խմբակցության պատգամավոր Սրբուհի Գրիգորյանը:

Վաղարշակ Հարությունյանը պատասխանեց, որ միջադեպը տեղի է ունեցել այն պատճառով, որ մեր հովիվը մոտեցել է սահմանին, որտեղ էլ քաշքշուկ է տեղի ունեցել, որը հետո հարթվել է: «Ուզում եմ ձեզ հստակ ասել, որ այն սահմանները, որոնք նախատեսված էին ԽՍՀՄ-ի ժամանակ և արդեն ճանաչված անկախ Հայաստանի ժամանակ, հիմա ամբողջովին պահպանվում է: Հիմա ասեմ, որ տեղեր կան, որտեղ մերոնք 50 մետր առաջ են, կան տեղեր, որ հակառակն է և սա պայմանավորված է այն հանգամանքով, որ դիրքը հնարավոր չէ դնել այնպիսի տեղ, որ ապահովի անվտանգությունը և վերահսկողությունը»:

Գրիգորյանի ճշտող հարցին, թե ի՞նչ է արվում, որ այս դեպքերը չկրկնվեն, որովհետև հավանական է, որ նորից հովիվ մոտենա սահմանին և չպետք է մեր քաղաքացիները ստորացվեն ադրբեջանցիների կողմից՝ նախարարի ժամանակավոր պաշտոնակատարը պատասխանեց.

«Ստորացվելու խնդիր չկա, բայց համապատասխան մարմինները պետք է քաղաքացիներին իրազեկեն, որ այդ դիրքերին մոտենալ պետք չէ: Սա բնական շփման գծի կյանքն է, որը եղել է և լինում է: 30 տարում դա կլինի Ղարաբաղում, թե այստեղ՝ ամենակարևորն այն է, որ չկան միջադեպեր, որոնք բերել են վիրավորներ կամ զոհեր: Այս միջադեպը կլինեն, պետք է եզրակացություն անենք և ամեն ինչ անենք, որ հովիվը չգնա և մոտենա ադրբեջանական դիրքերին»:

Մանրամասները՝ տեսանյութում։