Տուրիստական ընկերությունների ներկայացուցիչները ակցիա արեցին բանկերից մեկի մոտ՝ պահանջով՝ բանկերը պետք է վերանայեն վարկերի տոկոսադրույքները (տեսանյութ)

«VTB» բանկի գլխավոր շենքի դիմաց՝ Սարյան փողոցում, հավաքվել են տուրիստական ընկերությունների ներկայացուցիչները։ Նրանք փակել են Սարյան փողոցը՝ նշելով՝ համավարակի պատճառով խնդիրներ են առաջացել իրենց աշխատանքում, պետությունը խոստացել է, որ պետք է վերանայի տոկոսադրույքները, քանի որ իրենք բանկերից բավական գումարներ են վերցրել աշխատանքը իրականացնելու համար, իսկ համավարակի պատճառով չեն կարողացել և հետևաբար մարել վարկերը: Նշեցին, որ Էկոնոմիկայի նախարարությունից նրանց վստահեցրել են, որ կվերանայվեն տոկոսադրույքները, սակայն բանկերը նրանց չեն ընդառաջել և հաշվի չեն առել որոշումը:

Լրագրողների հետ զրույցում տուրիստական ընկերության ներկայացուցիչ Արմեն Աբգարյանը նշեց՝ պետք չէ հարվածել այն ճյուղերին, որոնք վաղը դժվար է լինելու վերականգնել, իսկ տուրիստական ընկերության ներկայացուցիչները չեն կարող այդքան սպասել:

«Մենք մատակարար ենք, մենք մատաղի գառներ չենք, այս մի քանի մեքենան, որ դուք տեսնում եք, մենք 500-ից ավելի մեքենաներ, ավտոբուսներ և սպրինտերներ ունենք, հաստատ չենք սպասելու, որ հերթով մատաղի պես բոլորին մորթեն, և պատրաստ ենք պայքարել մինչև վերջ ու մեր իրավունքները պաշտպանել, մենք ոչ թե անպարտաճանաչ տնտեսվարողներ ենք և վարկառուներ, որոնք չեն կարողանում մարել իրենց վարկերը, այլ երկրի վիճակն է այսպիսին, ամբողջ աշխարհում է լոքդաուն»,- ասաց Արմեն Աբգարյանը:

Նա նաև նշեց՝ բանկերը մոտ մեկ տարի առաջ զանգահարում և խնդրում էին, որ օգտվեն հենց իրենց ծառայություններից, իսկ հիմա չեն ընդառաջում՝ լավ գիտակցելով՝ այս բարդույթները ժամանակավոր են, և որոշ ժամանակ անց տուրիզմը կրկին կդառնա կարևոր ոլորտ:

«Այստեղ են տուրիստական կազմակերպությունների ներկայացուցիչները, որոնք զբաղվում են զբոսաշրջությամբ և վերջին 10 տարիների մեր աշխատանքի, բանկերի և անձնական միջոցների շնորհիվ հասել ենք նրան, որ տարածաշրջանում մեր տրանսպորտային պարկը ամենազարգացածն ու արդիականը լինի, բայց հիմա կան ժամանակավոր բարդություններ, և բանկերը որոշել են, որ շերեփի մեջ խավիարը պակասել է և ցանկանում են արդեն բնակարանները վաճառել, որպեսզի լրացնեն իրենց տոկոսները: Այստեղ 2-3 շաբաթ սպասելու խնդիր էր, ոչ ավելի, բայց չեն ցանկանում օգնել»,- հավելեց նա:

Արմեն Աբգարյանը նաև ընդգծեց՝ կառավարության մոտեցումը ծրագրի շրջանակում ևս խտրական է, քանի որ դրված են չափորոշիչներ, որոնց պատճառով շատ ընկերություններ չեն կարողանում ծրագրից օգտվել:

«Բոլորը սպասարկող ոլորտից են և բանկային տվյալներով ցույց են տալիս, որ իրոք տուրիզմի ոլորտից են, նախորդ նախարարն ասեց՝ 14 միլիարդ դրամի մասին է խոսքը, 7 միլիարդ՝ տուրօպերատորներին, 7 միլիարդը՝ տրանսպորտային ընկերություններին, այսքանով սահմանափակվել են: Եթե մեր ձայնը լսելի չլինի, հաջորդ անգամ ամբողջ քաղաքը կփակենք 500 տրանսպորտով»,- նշեց նա:

Անհատ ձեռնարկատեր Արսեն Բենիամինյանը լրագրողների հետ զրույցում տեղեկացրեց՝ «VTB» բանկը չի գնում որևէ փոխզիջման, նրանց նամակ է ուղարկվել  նախարարությունից, Կենտրոնական բանկից, բայց միևնույն է ոչ մի փոխզիջում չկա:

«Նամակ են ուղարկել բանկին՝ սպասեք և նոր ծրագրով, ովքեր դուրս են մնացել և հիմա հնարավորություն ունեն նորից ծրագրի մեջ մտնելու կկարողանան օգտվել, բայց բանկը ոչ մի փոխզիջման չի գնում՝ տույժեր, տուգանքներ և այլն»,- ասաց Բենիամինյան Արսենը:

Տուրիստական ընկերության ներկայացուցիչները նշեցին՝ բանկի տնօրենը տեղում չէ, բայց տեղակալը պատրաստ է հանդիպել և քննարկում ունենալ ներկայացուցիչների հետ:

«Հարգելի կառավարություն, այս մարդկանց ստեղծած աշխատանքի միջոցով, հարկերի հիման վրա եք դուք ստանում աշխատավարձ և պարգևավճար, ավելի ուշադիր եղեք տնտեսվարողների խնդիրներին»,- նշեց տուրիստական ընկերության ներկայացուցիչներից մեկը: