Վոլոդինը հայտնել է Բաց երկնքի պայմանագրից Ռուսաստանի դուրս գալու պատճառը

Ռուսաստանի`«Բաց երկնքի» պայմանագրից դուրս գալը պայմանավորված է ազգային անվտանգության հարցերով: Այս մասին լրագրողների հետ զրույցում հայտարարել է ՌԴ Պետդումայի նախագահ Վյաչեսլավ Վոլոդինը, գրում է «ՌԻԱ Նովոստի» գործակալությունը:

«Մենք ամեն դեպքում պետք է դուրս գանք, ամեն ինչը վնասում է մեր անվտանգությանը: Եթե ԱՄՆ արբանյակային երկրների ինքնաթիռները թռչում են մեր երկրի վրայով և մոնիտորինգ են անցկացնում, ապա ինչ անվտանգության մասին կարող է խոսք լինել»,- ասել է նա ՝ ավելացնելով, որ «Բալթյան երկրները և եվրոպական որոշ երկրներ զեկուցելու են օվկիանոսից այն կողմ գտնվող իրենց տիրոջը»:

Ինչպես ավելի վաղ տեղեկացրել էր Tert.am-ը, Նախագահ Վլադիմիր Պուտինը Դումային ներկայացրել է Ռուսաստանի Դաշնության կողմից Բաց երկնքի պայմանագրի (ԲԵՊ) դենոնսացիայի մասին թիվ 1168313-7 օրինագիծը:

Բաց երկնքի պայմանագիրն ստորագրվել է (ԲԵՊ, The Treaty on Open Skies) 1992 թվականի մարտի 24-ին Հելսինկիում՝ Եվրոպայի անվտանգության և համագործակցության կազմակերպության (ԵԱՀԿ) 23 անդամ-պետությունների ներկայացուցիչների կողմից: Ռուսաստանը պայմանագիրը վավերացրել Է 2001 թվականի մայիսի 26-ին: Մասնակից երկրներն իրավունք են ստանում թռչել միմյանց տարածքների շուրջը՝ ռազմական գործունեությունը վերահսկելու նպատակով: 2020 թվականի նոյեմբերին ԱՄՆ-ը դուրս է եկել ԲԵՊ-ից: 2021 թվականի հունվարին նմանօրինակ ընթացակարգ սկսելու մասին հայտարարել է Ռուսաստանի ԱԳ նախարարությունը: Մոսկվան իր վերադարձը համաձայնագրին հնարավոր է համարել, եթե նույն բանն անի Վաշինգտոնը, սակայն ապրիլի վերջին ԱԳՆ-ում արձանագրել են, որ ամեն բան ընթանում է դեպի պայմանագրի վերացում, և հավելել, որ Ռուսաստանում ԲԵՊ-ի դենոնսացիայի ընթացակարգը կավարտվի մինչև մայիսի վերջը: