Մեծ Բրիտանիայում էկոակտիվիստներն արգելափակել են McDonald's-ի պահեստները՝ պահանջելով ճաշացանկից հանել կենդանական ծագում ունեցող մթերքները (լուսանկարներ)

Animal Rebellion («Ապստամբություն՝ ի պաշտպանություն կենդանիների») շարժման ակտիվիստները, որոնք հանդես են գալիս կենդանական ծագում ունեցող մթերքներից հրաժարվելու օգտին, արգելափակել են Մեծ Բրիտանիայում արագ սննդի McDonald's ռեստորանների ցանցի չորս պահեստները, հաղորդում է The Guardian-ը՝ նշելով, որ էկոակտիվիստները հույս ունեն խափանել ամբողջ երկրում McDonald's-ի մոտ 1,3 հազար կետերի աշխատանքը։

Նշվում է, որ ակտիվիստները մեծ բեռնատարներ են կայանել Հեմել Համփսթեդ (Հարթֆորդշիր կոմսություն), Բեյզինգսթոուք (Հեմփշիր կոմսություն), Քովենթրի (Ուեսթ Միդլենդս կոմսություն) և Հեյվուդ (Մեծ Մանչեսթեր կոմսություն) քաղաքների պահեստների մուտքերի մոտ։

Ակտիվիստների խոսքով՝ ցանկանում են հասնել նրան, որ McDonald's ռեստորանների ցանցը ստանձնի մինչև 2025 թվականը իր ճաշացանկից կենդանական ծագում ունեցող մթերքներն ամբողջությամբ հանելու պարտավորությունը։

Ցուցարարները մտադիր են պահեստների աշխատանքը արգելափակել առնվազն մեկ օր։