Ջորջ Ֆլոյդի հարազատները նրա հիշատակին քայլերթ են կազմակերպել (լուսանկարներ)

Աֆրոամերիկացի Ջորջ Ֆլոյդի հարազատները, բազմաթիվ աջակիցների ուղեկցությամբ, քայլերթ են կազմակերպել նրա մահվան առաջին տարելիցի կապակցությամբ, հայտնում է Reuters լրատվական գործակալությունը։

Լրատվական գործակալության տվյալներով՝ սա աֆրոամերիկացու մահվան առաջին տարելիցի կապակցությամբ կազմակերպված միջոցառումներից մեկն է։ Երթի ընթացքում մասնակիցները պարզել են Ֆլոյդի և ոստիկանության կողմից սպանված այլ աֆրոամերիկացիների դիմանկարները։

Եղբոր մահվան մասին խոսելով՝ Ֆլոյդի քույրն ասել է․ «Մեր կյանքը մի ակնթարթում փոխվեց, և ես դեռևս չգիտեմ՝ ինչու»։ Երթից բացի, մի շարք միջոցառումներ են անցկացվելու «Ջորջ Ֆլոյդի հիշատակի հիմնադրամ»-ի նախաձեռնությամբ։

Քաղաքացիական իրավապաշտպաններից մեկի համոզմամբ՝ Ֆլոյդը պետք է պատմության մեջ մտնի ո՛չ թե որպես ինչ որ մեկի ծնկի տակ հայտնված մարդ, այլ որպես ոստիկանական դաժանության և անօրինականության շղթան կոտրած մեկը։

Հիշեցնենք, որ Ջորջ Ֆլոյդը սպանվել էր 2020 թվականի մայիսի 25-ին այն բանից հետո, երբ Մինեապոլիսի ոստիկանության աշխատակից Դերեք Չավինը 8 րոպե ծունկով սեղմել էր նրա պարանոցը։ Վերջին՝ «Ես չեմ կարողանում շնչել» խոսքերը, որն ասել էր տղամարդը, նրա մահվանը հաջորդած բողոքի ակցիաների ընթացքում թևավոր խոսքեր էին դարձել։

Ոստիկանության 3 ծառայողների նկատմամբ մեղադրանք է առաջադրվել։