Փորձում են դրանով կոծկել իրենց արածները. Վաղարշակ Հարությունյանը՝ Ադրբեջանից հնչող հայտարարությունների մասին (տեսանյութ)

Այսօր Կառավարության հետ հարցուպատասխանի ժամանակ Ազգային ժողովում «Իմ քայլը» խմբակցության պատգամավոր Նազելի Բաղդասարյան հիշեցրեց Ադրբեջանի հայտարարությունը, թե հայկական կողմը մայիսի 24-26 ընկած ժամանակում գնդակոծել է Ադրբեջանի մարտական դիրքերը, ընդ որում այդ հայտարարությունը հաջորդել է նախօրեին տեղի ունեցած ողբերգական դեպքերին: «Իհարկե, զավեշտալի է, որ այդ հայտարարությունը 2 օր ուշացումով է արվել»,-ասաց նա:

ՀՀ պաշտպանության նախարարի պաշտոնակատար Վաղարշակ Հարությունյանը հիշեցրեց, որ նախարարությունը մի քանի ժամ առաջ հերքել է այդ տեղեկատվություն: «Այստեղ ակնհայտ է Ադրբեջանի մտահաղացումը: Իրենք, քանի որ մեր տարածքում օգտագործել են զենք, որի արդյունքում զոհվել է մեր զինվորը, փորձում են դա կոծկել: Ես կապվել եմ խաղաղապահ ուժերի հետ, որոնք այդ տեղեկությունը հերքել են: Այնպես որ, սա իրենց կողմից հնարք է, որ հանրությանը ցույց տան, որ հայկական կողմը գնում է գործողությունների, և իրենք խաղաղ են այնտեղ: Փորձում են դրանով կոծկել իրենց արածները»,-ասաց նա:

Վաղարշակ Հարությանը նշեց, որ հայկական կողմը հստակ գիտի նրանց մտահաղացումը, թե ինչ մարտավարություն են մշակել: