Բելառուսը լքած հաղորդավարուհուն սպառնում են՝ կձերբակալեն ամբողջ ընտանիքին, եթե նա չվերադառնա երկիր (տեսանյութ)

Բելառուսական «Բելսաթ» հեռուստաընկերության հաղորդավարուհի Արինա Մալինովսկայային սպառնում են, որ կձերբակալեն նրա ամբողջ ընտանիքին, եթե վերջինս չվերադառնա Բելառուս, գրում է korrespondent.net-ը:

Նշվում է՝ Մալինովսկայան լքել է Բելառուսը և գնացել Ուկրաինա այն բանից հետո, երբ մայիսի 22-ին ձերբալալվել են «Բելսաթ»-ի իր վեց գործընկերները: Արդեն մայիսի 24-ին նրան զանգահարել է քննիչը և ասել, որ իր ամբողջ ընտանիքը կձերբակալվի և անազատության մեջ կգտնվի այնքան ժամանակ, քանի դեռ նա չի ներկայանա:

Բացի այդ, քննիչը նրա քրոջ ամուսնու՝ Վալենտին Կուչերենկոյի թելեգրամյան համարի միջոցով զանգահարել է նրան և ասել, որ Վալենտինն ու նրա ընկերը «իրենց մոտ են», և որ այժմ նրանք գնալու են կնոջ տատիկ-պապիկի ետևից: Շուտով Վալենտինն ինքն է զանգահարել Արինային և ասել, որ իրեն և հյուր եկած գործընկերոջը «տանում են»: Նրա խոսքով՝ քննիչները ցանկացել են իմանալ, թե երբ լրագրողը կկարողանա գալ, և տեղեկացրել են, որ նրանք «հանգիստ չեն թողնի ո՛չ մեզ, ո՛չ էլ նրանց ծնողներին»:

Քննիչների խոսքերով՝ իրենք ենթադրաբար ցանկանում են վարչական գործով հետաքննություն անցկացնել լրագրողի դեմ: Այնուհետև, քննիչի հետ մեկ այլ զրույց է տեղի ունեցել: Իրավապահ մարմնի աշխատակիցը հարցրել է, թե որ օրվանից է Մալինովսկայան գտնվում Ուկրաինայում և ասել է, որ ցանկանում են տեսնել նրան, որպեսզի «հարցեր ուղղեն նրան հետաքննության նյութերի վերաբերյալ»: Միևնույն ժամանակ, քննիչը հրաժարվել է բացատրել, թե ինչի մասին է գործը և ինչ հիմքերով են բերման ենթարկվել Մալինովսկայայի հարազատները՝ պատճառաբանելով, որ Թելեգրամով պետք չէ քննարկել «քննության նյութերը»:

Հետագայում հաղորդավարուհուն դարձյալ զանգահարել է քրոջ ամուսինը և նշել՝ իրեն շարունակում են հարցնել, թե երբ կվերադառնա Արինան: Բացի այդ, քննիչը բազմիցս կրկնել է, որ նա ազատ չի արձակվի, քանի դեռ կինը չի համաձայնվել վերադառնալ Բելառուս:

Տեսանյութը կարող եք դիտել այստեղ: