Առանցքային հարցերը մնում են չլուծված. միջուկային հարցերով Իրանի գլխավոր բանագնաց

Իրանի միջուկային ծրագրի շուրջ Վիեննայում անցկացվող բանակցային գործընթացում իրանական պատվիրակության ղեկավար Սեյեդ Աբբաս Արաղչին ասել է, որ հիմնական խնդիրները մնում են չլուծված, հայտնում է Tehran Times-ը և հավելում, որ Ավստրիայի մայրաքաղաք Վիեննայում վերսկսվել են 2015 թվականին ստորագրված Իրանի միջուկային համաձայնագրի վերականգնմանն ուղղված բանակցությունները։

«Այսօր վերսկսվել է Իրանի միջուկային համաձայնագրի Միավորված հանձնաժողովի հետ մեր բանակցությունների հինգերորդ փուլը։ Առաջին հանդիպումն արդեն կայացել է, և աշխատանքները կշարունակվեն աշխատանքային խմբերի կողմից», - ասել է Արաղչին։

Իրանի Իսլամական Հանրապետության փոխարտգործնախարարն ասել է, որ բոլոր կողմերը լուրջ են տրամադրված և ամենայն հավանականությամբ բանակցությունների այս փուլը կարող է հարցի կարգավորման համար վերջինը լինել, սակայն հավելել է, որ կան կարևոր հարցեր, որոնք դեռևս լուծված չեն։

«Բանակցությունների համար ժամկետներ նշել չեմ կարող և ո՛չ էլ կարող եմ հաստատ ասել, որ այս փուլը բանակցությունների համար վերջինը կլինի: Մնացած խնդիրները, մեր կարծիքով, պետք է լուծվեն մեզ բավարարող ձևով։ Կարևոր է, որ այն, ինչը ծառայում է Իրանի ազգային շահերին, ուշադիր դիտարկվի և բավարարվի թե՛ բանակցություններում և թե՛ գրված տեքստերում», - ասել է Արաղչին և հավելել, որ ցանկացած որոշում ի վերջո կայացվելու է Թեհրանում։

Նա նշել է, որ վստահ չէ, որ հնարավոր կլինի ավարտել բանակցությունները, սակայն հավանականությունը կա:

Հիշեցնենք, որ 2015 թվականին «վեցյակի» (Մեծ Բրիտանիա, Գերմանիա, Չինաստան, Ռուսաստան, ԱՄՆ, Ֆրանսիա) եւ Իրանի միջև կնքված Գործողությունների համատեղ համապարփակ ծրագիրը, որը ենթադրում է պատժամիջոցների վերացում՝ Իրանի միջուկային ծրագրի սահմանափակման դիմաց՝ որպես Թեհրանի կողմից միջուկային զենք չստանալու երաշխավորություն, երեք տարի էլ գոյություն չունեցավ. 2018-ի մայիսին ԱՄՆ-ը հայտարարել էր դրանից միակողմանի դուրս գալու եւ Թեհրանի դեմ խիստ պատժամիջոցների վերականգնման մասին: