Հանրակրթության չափորոշիչը գաղտագողի են հաստատել. սեպտեմբերից այն դպրոց կմտնի. Քրիստինե Վարդանյան (տեսանյութ)

Արդեն մի քանի ամիս է՝ Արայիկ Հարությունյանն այլևս ԿԳՄՍ նախարարը չէ, բայց նրա ղեկավարած թիմի առաջ քաշած հանրակրթության պետական չափորոշիչը միս ու արյուն է ստանում՝ ի հեճուկս երկարատև պայքարի: Այդ ծրագրի դեմ բողոքող երիտասարդներից մեկը «Հայաստան» դաշինքի անդամ Քրիստինե Վարդանյանն էր: Tert.am-ի հետ զրույցում նա նշեց՝ վերջին ակցիան 2020 թվականի սեպտեմբերի 21-ին են արել, հետո պատերազմն ավելի կարևոր խնդիրներ առաջացրեց, զբաղվեցին դրանցով, մինչդեռ կառավարությունը, ինչպես ինքն է նշում, անդրդվելի մնաց այդ հարցում՝ ներքին ու արտաքին քաղաքական վայրիվերումների ֆոնին գրեթե գաղտագողի հաստատվեց նոր չափորոշիչը, որը 2021-ի սեպտեմբերից այն կմտնի դպրոց:

«Նրանք պարզապես օգտվեցին այս առիթից, թույլ տվեք ասել, որ սղացրեցին, քանի որ մարդիկ զբաղված էին երկիր փրկելով: Նրանց համար վատ նորություն կա. հունիսի 20-ից արդեն իշխանություն չեն լինելու, և հաջորդ իշխանությունը, մեղմ ասած, իրենց բռնած գործի շարունակողը չի լինելու»,- հավելեց Քրիստինե Վարդանյանը:

Հանրակրթության պետական նոր չափորոշիչով կրտսեր դպրոցում աշակերտների գնահատման կարգը հանվում է, առաջարկվում է նաև հրաժարվել «անբավարար» գնահատականից, ինչը նշանակում է, որ այլևս նույն դասարանում մնալու և կրթական ծրագիրը կրկնելու ինստիտուտը չի գործի: Սա իր հերթին մեծ աղմուկ էր բարձրացրել, բայց ամենաանհանգստացնողներից մեկը, Վարդանյանի համոզմամբ «Հայոց եկեղեցու պատմություն» առարկայի դասավանդման մեթոդն է. չափորոշիչի համաձայն՝ փաստացի այն դուրս է մղվում ծրագրից:

Մանրամասները՝ տեսանյութում: