Լիբանանի վարչապետը հայտարարել է, որ հրաժարական կտա, եթե նախագահ Միշել Աունը կրկին չհաստատի կառավարության՝ իր կողմից ներկայացված կազմը

Լիբանանի վարչապետ Սաադ Հարիրին հայտարարել է, որ վայր կդնի կառավարություն ձևավորելու իր լիազորությունն ու հրաժարական կներկայացնի, եթե նախագահ Միշել Աունը կրկին մերժի կառավարության կազմի առաջարկված նոր տարբերակը, հաղորդում է ТАСС-ը՝ հղում անելով լիբանանյան LBC հեռուստաալիքին, որն էլ իր հերթին նշված տեղեկատվությունը հրապարակել է՝ հղում անելով կառավարության իր աղբյուրներին:

Հարիրին խորհրդարանի ղեկավարին հայտնել է, որ ինքը և իր ղեկավարած սուննիստական «Ալ-Մուստակբալ» խմբակցության պատգամավորները կհեռանան խորհրդարանից, եթե կառավարություն ձևավորելու իր ջանքերը տապալվեն: 

Եթե նման բան պատահի, ապա, ըստ աղբյուրի, Լիբանանում խորհրդարանական արտահերթ ընտրություններն անխուսափելի կլինեն:

ԱՎելի վաղ դեռևս նախորդ տարվա հոկտեմբերի 22-ին կրկին վարչապետի պաշտոնը ստանձնած Հարիրին հավանություն էր տվել խորհրդարանի ղեկավարի նախաձեռնությանը՝ կառավարության անդամների թիվը 18-ից 24-ի հասցնելու վերաբերյալ, որի մեկ երրորդը պետք է հաստատվի հանրապետության նախագահի, երկու երրորդը՝ վարչապետի և խորհրդարանի ղեկավարի կողմից: Իմաստը ոչ մի ուժի քաղաքական որոշումների կայացման հարցում գերիշխող դիրք զբաղեցնելը բացառելն է:

Լիբանանի պետական կառավարման կրոնական կառուցվածքի համաձայն՝ վարչապետի պաշտոնը պատկանում է սուննի դավանող մահմեդական համայնքին, խորհրդարանի ղեկավարինը՝ շիաներին, իսկ նախագահի պաշտոնը՝ մարոնիտներին. վերջին համայնքին են պատկանում Լիբանանի քրիստոնյաների մեծամասնությունը:

2020 թ. դեկտեմբերի 9-ին Հարիրին նախագահին էր ներկայացրել կառավարության հնարավոր ցանկը, բայց Միշել Աունը հրաժարվել էր հաստատել այն՝ մեղադրելով վարչապետին նրանում, որ վերջինն իր հետ չի համաձայնեցրել ցանկը: Աունի և Հարիրիի վերջին հանդիպումն այս տարվա մարտի 22-ին է կայացել, որի ժամանակ ևս համաձայնության չէր ստացվել հասնել կառավարություն ձևավորելու հարցում: 

Մայիսի 22-ի իր ուղերձում Հարիրին խորհրդարանում ուղերձով հանդես եկավ՝ կոչ անելով նախագահին «ճանապարհ բացել նոր կառավարության ձևավորման և Պատգամավորների պալատում վստահության քվե ստանալու համար»: