Մեր երկրում ոչ մի տարիքային խմբի ներկայացուցիչ չի գտնվում բարվոք վիճակում, ոչ մի ոլորտում զարգացում չկա, միայն դատարկ խոսքեր են. Գագիկ Ծառուկյան (տեսանյութ)

Ամբողջ աշխարհում պետությունները իրենց ժողովրդին գումար են տրամադրում, նվերներ տալով՝ ապահովվում են շատ ընտանիքներ, իսկ մեզ մոտ ոչինչ չեն տալիս: Այս մասին այսօր ասել է «Բարգավաճ Հայաստան» կուսակցության ղեկավար Գագիկ Ծառուկյանը Տավուշի մարզում իրականացվող քարոզարշավի ժամանակ:

«Ես չեմ ասում, որ նվիրաբերում անեն, բայց պետք է ժողովրդին մինչև 3 միլիոն դրամ ներում շնորհեն, մարդկանց ունեցվածքը հետ վերադարձնեն, որ մարդիկ կարողանան իրենց ընտանիքը պահեն ու չաղքատանան»,-ասաց Գագիկ Ծառուկյանը:

Նա նշեց՝ երկրում ոչ մի տարիքային խմբի ներկայացուցիչ չի գտնվում բարվոք վիճակում, այդ թվում՝ ուսանողները, որոնք, ինչպես ինքն է նշում՝ 3-4 տարի շարունակ պարտք են արել և մուծել իրենց վարձը:

«Այսօր ոչ մի ոլորտում զարգացում չկա, միայն դատարկ խոսքեր են՝ սկսած թոշակառուից և վերջացրած ծառայողով: Ուսանողը 3-րդ, 4-րդ կուրսում պարտքեր, վարկեր վերցնելով՝ վճարել է իր վարձը, այլևս ճար չկա, ու այդ երեխայի տարիների սովորածը կորում է, վճարումները կորում են, բայց պետությունը այդ երեխայի հետ Հայաստանում պայմանագիր չի կապում, որպեսզի ուսանողը ավարտելուց հետո պետության կողմից գործուղվի աշխատանքի»,- նշեց նա:

Մանրամասները՝ տեսանյութում: