««Հայաստան» համահայկական հիմնադրամին նվիրաբերած գումարները լափվեցին, այս իրավական գործընթացում ներգրավելու ենք նաև միջազգային իրավապահների». փաստաբաններ (տեսանյութ)

«Մեր փաստաբանական գրասենյակ են դիմել ամերիկաբնական սփյուռքահայերը, ովքեր բավականին վրդովված են, որ իրենց նվիրաբերած գումարները բացահայտ սխեմայով լափվեց կառավարության կողմից»: Այս մասին ասուլիսի ժամանակ ասաց փաստաբան Ալեքսանդր Կոչուբաևը՝ անդրադառնալով «Հայաստան» համահայկական հիմնադրամի՝ կառավարությանը հատկացված գումարներին:

«Ես չեմ խուսափում այդ գնահատականից, իրականում շատ պարզ սխեմայով այդ գումարները լափվեցին: Այս հետընտրական թոհուբոհից ուշքի գալով՝ պետք է շարունակել գործող իշխանական խմբավորման դեմ պայքարը բոլոր ուղղություններով: Պայքարներից մեկն էլ լինելու է այս կոռուպցիոն սխեմաների բացահայտումները»,- ասաց փաստաբանը:

Կոչուբաևի խոսքով՝ իրենք գործակցում են ամերիկաբնակ փաստաբան գործընկերների հետ, մասնավորապես՝ Գլենդելի դատախազության ուժերը պետք է ներդնեն, քանի որ, իր խոսքով, «լափվել են» Գլենդելի ամերիկաբնակ հայերի գումարները:

«Նախաձեռնությունը կարծես թե Հիմնադրամինն էր, բայց Կառավարությունը կարծես թե ճնշումներով ամբողջ Հայաստան համահայկական հիմնադրամում առկա գումարներն իբր թե նվիրաբերության պայմանագրով տրվեցին կառավարությանը» ,- ասաց նա:

Կոչուբաևը տեղեկացրեց, որ իրենք մի քանի գործողություն են պլանավորում  լափված գումարների սխեման բացահայտելու և դրանք հիմնադրամ վերադարձնելու,  դրանք կանոնադրային նպատակներին ծառայեցնելու նպատակով:

Փաստաբան Աբգար Պողոսյանն էլ նշեց, որ այստեղ առկա է յուրացման հանցակազմ:

«Երբ մենք խոսում ենք համահայկական հիմնադրամի մասին, ապա նրանց վստահել են այդ գումարը և այդ սխեմայի շրջանակում փոխանցել են կառավարությանը, ինչն իրականում հափշտակության տեսակ է: Այս մասով հաղորդում ենք ներկայացնելու գլխավոր դատախազին: Քանի որ նաև գործ ունենք օտար երկրի քաղաքացիների հետ, միտք ունենք ներգրավել նաև միջազգային իրավապահ մարմիններին»,- ասաց Պողոսյանը:

Նրա խոսքով` հանգամանքները կարող են լիարժեք բացահայտվել, միայն պատշաճ իրավական ընթացակարգով: Միայն հարուցված քրեական գործով կարելի է  այս հանգամանքների հարցերի պատասխանը ստանալ:

«Շատ կարևոր է նաև հասկանալ`համահայկական հիմնադրամը գործել է սեփական նախաձեռնությամբ, թե՞ ստիպել են, կամ ընդհանուր խումբ է գործել: Այս մասով մենք կարծում ենք, որ մի հոգու կողմից չէ կատարվել հանցագործությունը, գործ ունենք  կազմակերխված խմբի հետ»,- ասաց Պողոսյանը:

Փաստաբան Նաիրա Հակոբյանն էլ ասաց՝ որքան էլ կառավարությունը փորձի օրինականացնել իր գործողությունները, ամեն դեպքում իրավական տեսանկյունից կան բազմաթիվ խախտումներ ու չարաշահումներ, որոնք հակասում են մեկը մյուսին:

«Կառավարությունը նվիրաբերության այդ պայմանագիրը կնքելուց հետո ֆինանսների նախարարության միջոցով փորձեց պարզաբանում տալ նշված հարցերին, սակայն այդ պարզաբանումը ավելի շատ ենթադրում է հակաիրավական գործընթաց: Այդ նվիրաբերության պայմանագիրը կնքվել է բազմաթիվ իրավախախտումնրով և հանգեցրել է նրան, որ համահայկական հիմնադրամին նվիրաբերություն կատարած անձինք տեղյակ չեն՝ ինչի հիման վրա իրենց տրամադրած փողի մեծ մասը փոխանցվել է ՀՀ կառավարությանը»,- ասց փաստաբանը:

Նրա խոսքով՝ այդ գործընթացը հակասում է ՀՀ բյուջետային համակարգի մասին օրենքին, հիմնադրամների մասին օրենքին և հենց «Հայաստան» Համահայկական հիմնադրամի կանոնադրությանը:

Մանրամասները՝ տեսանյութում