Ֆլորիդայում պայթեցրել են օրերս փլված 12-հարկանի բնակելի շենքի կանգուն մնացած հատվածը (տեսանյութ, լուսանկարներ)

ԱՄՆ-ի Ֆլորիդա նահանգի Սերֆսայդ քաղաքում հունիսի 24-ին փլված 12-հարկանի բնակելի շենքի կանգուն մնացած հատվածն ապամոնտաժվել է, հայտնում է BBC լրատվականը և հավելում, որ դրա համար ժամանակավորապես դադարեցվել են փլված մասի տարածքում որոնողափրկարարական աշխատանքները։

Շենքի կանգուն մնացած հատվածը քանդելու վերաբերյալ որոշումը կայացվել է «Էլզա» փոթորկի մոտենալու լուրերի ֆոնին։ Շենքն ապամոնտաժվել է պայթեցման միջոցով։

Փլված հատվածը ծածկվել է վրանի համար նախատեսված անջրանցիկ կտորով՝ այն ապամոնտաժման ընթացքում փոշուց և բեկորներից պաշտպանելու համար։ Քաղաքապետն էլ, իր հերթին, մոտակա շենքերի բնակիչներին խորհուրդ է տվել մնալ տներում և փակել պատուհանները:

Ինչպես ավելի վաղ տեղեկացրել էր Tert.am-ը, ԱՄՆ-ի Ֆլորիդա նահանգի Սերֆսայդ քաղաքում 12-հարկանի բնակելի շենք է փլվել։ Հայտնի չէ, թե շենքի փլուզման ժամանակ քանի մարդ է եղել շենքում։ Զոհերի թիվը հասել է 24-ի, իսկ անհայտ կորածները 121-ն են: Զոհերի թվում կա 3 երեխա։

«Մենք պատրաստ ենք վատ լուրերի՝ հաշվի առնելով ավերածությունների ծավալը»,- ասել էր Ֆլորիդայի նահանգապետ Ռոն Դեսանտիսը։