Արմեն Չարչյանի գործը կարճելու միջնորդություն կներկայացվի դատարան. պաշտպան (տեսանյութ)

Սա ծաղր է իրավաբանության նկատմամբ, բայց մենք երբեք մեր վերաբերմունքը, դատավորի նկատմամբ չենք պայմանավորում դատական ակտով: Այս մասին այսօր լրագրողների հետ զրույցում ասաց «Հայաստան» դաշինքի պատգամավորի թեկնածու, «Իզմիրլյան» բժշկական կենտրոնի տնօրեն Արմեն Չարչյանի պաշտպան Էրիկ Ալեքսանյանը:

«Տիկին Աբգարյանը պրոֆեսիոնալ դատավոր է և իրավաբան, սակայն իր կողմից ներկայացված այս որոշումը մեզ համար անընդունելի է, քանի որ որևէ հիմք չկա Չարչյանին անազատության մեջ պահելու»,- ասաց նա:

Նշենք, որ Վերաքննիչ քրեական դատարանը՝ դատավոր Լուսինե Աբգարյանի նախագահությամբ, հրապարակեց Արմեն Չարչյանին կալանավորելու որոշման դեմ պաշտպանների բողոքի որոշումը։ Չարչյանի պաշտպան Էրիկ Ալեքսանյանն ընդգծեց, որ այս գործը որևէ աղերս չունի իրավաբանության հետ:

«Սա միանշանակ քաղաքական երանգ պարունակող զուտ հանգամանքներ են, որոնք ստիպում են դատավորին նման որոշում կայացնելու: Սա իրավական պայքար է, բացառապես իրավական, մենք հարգում ենք մեր մասնագիտությունը և միանշանակ երբեք գործը չենք անձնավորում և որևէ մեկի նկատմամբ որևէ անձնական վերաբերմունք պայմանավորված գործի հետ չունենք»,- նշեց նա:

Պաշտպանը նաև մանրամասներ ներկայացրեց գործի հետագա ընթացքի վերաբերյալ և տեղեկացրեց, որ վարույթ ընդունելու մասին որոշումը դեռ չեն ստացել:

«Վարույթ ընդունելուց հետո դատարանը պետք է 8 օրվա շրջանակներում դատական նիստ հրավիրի Սահմանադրության համաձայն և խափանման միջոցի քննարկում իրականացնի: Արմեն Չարչյանի գործը կարճելու միջնորդությունը կներկայացվի դատարան և համապատասխան հիմնավորումներ ենք ներկայացրել, որպեսզի դատարանը հենց այս փուլում, այսինքն՝ դեռ դատական քննության փուլ չանցնելով քրեական վարույթը դադարեցնի»,- ասաց Էրիկ Ալեքսանյանը: