ԱՄՆ-ում 4 երեխաների մայրը կորոնավիրուսի դեմ պատվաստվածների համար անցկացվող վիճակախաղով 1 միլիոն դոլար է շահել (լուսանկարներ)

ԱՄՆ-ի Կոլորադո նահանգի բնակչուհին կորոնավիրուսի դեմ պատվաստվածների համար անցկացվող վիճակախաղով շահել է 1 միլիոն դոլար։ Հաղթող Հեյդի Ռասսելի անունը հայտնել է Կոլորադոյի նահանգապետ Ջարեդ Փոլիսը, գրում է Associated Press-ը։

«Այս մրցանակն այնքան կօգնի 4 երեխաներիս դաստիարակության հարցում», - ասել է Հեյդի Ռասսելն ու հավելել, որ աղջիկն այդ մասին իմանալով՝ բացականչել է, որ իր քոլեջի վարձավճարը կմուծվի։

Կոլորադոյում պատվաստվածների համար վիճակախաղում 5 անգամ խաղարկվել է 1 միլիոն դոլար։ Վիճակախաղին մասնակցել են բոլոր այն բնակիչները, որոնք ստացել են պատվաստանյութի առնվազն 1 չափաբաժին։ Նահանգապետ Փոլիսը կարծում է, որ վիճակախաղը դրդում է մարդկանց պատվաստվել կորոնավիրուսի դեմ։

Ծրագրի շրջանակում Կոլորադոյի նահանգապետարանը նաև 50 հազարական դոլար կրթաթոշակ է խաղարկել 12-ից 17 տարեկան բնակիչների շրջանում, որոնք պատվաստվել են կորոնավիրուսի դեմ։ Հաղթողները կարող են գումարն օգտագործել իրենց նախընտրած ուսումնական հաստատություններում սովորելու համար՝ ինչպես Կոլորադոյում, այնպես էլ դրանից դուրս։