Վրաստանի մի շարք խոշոր քաղաքներում տեղի են ունենում բողոքի ակցիաներ. Բաթումում պահանջում են կառավարության հրաժարականը (լուսանկարներ, տեսանյութ)

Վրաստանի մի շարք խոշոր քաղաքներում՝ Զուգդիդի, Բաթում, Քութաիսի, Գորի, Ռուսթավի, բողոքի ակցիաներ են տեղի ունենում. ցուցարարները պահանջում են պարզել վրացական TV Pirveli հեռուստաալիքի օպերատոր Ալեքսանդր Լաշկարավայի մահվան պատճառը: Հայտնի է, որ այսօր իր տանը մահացած է հայտնաբերվել Լաշկարավան, որը հուլիսի 5-ին դաժան հարձակման էր ենթարկվել ԼԳԲՏ համայնքի երթի դեմ հանդես եկող քաղաքացիների ցույցի ժամանակ: Աղբյուրը նկատում է, որ օպերատորի մահը ցնցել է Վրաստանը:

Որոշ քաղաքներում պիկետները լուռ են և անցկացվում են «Երբ բառերը արդեն ավելորդ են» կարգախոսի ներքո: Մյուսներն ուղղակիորեն պահանջում են կառավարության հրաժարականը, հայտնում է sputnik-georgia.ru-ն: 

Զուգդիդիում մասնակիցները քայլել են քաղաքի փողոցներով, իսկ Բաթումում գործողությունը վերածվել է ոստիկանության հետ բախումների, երբ մասնակիցները փորձել են գրություններ կատարել կառավարության շենքի վրա: Կառավարության հրաժարականի պահանջները լսվում են Բաթումում անցկացվող ակցիայի ժամանակ:

Հիշեցնենք, որ Վրաստանի ընդդիմությունը հավաքվել է երկրի խորհրդարանի շենքի մոտ՝ պահանջելով կառավարության հրաժարականը: 

Թբիլիսիի Ռուսթավելի պողոտան գրավել են ընդդիմության, հասարակական կազմակերպությունների ներկայացուցիչները և լրագրողները, որոնք  իշխանություններին մեղադրում են Լաշկարավայի մահվան համար: 

Երկրի առաջին դեմքերը պաշտոնական ցավակցություն են հայտնել նրա ընտանիքին և խոստացել օբյեկտիվ հետաքննություն, մինչդեռ ընդդիմությունը մեղադրել է իշխանություններին հուլիսի 5-ին անգործության համար, երբ քաղաքը խառնաշփոթի մեջ էր և վիրավորվել էր ԶԼՄ-ների ավելի քան 50 ներկայացուցիչ:

Այսօրվա ակցիայի մասնակիցները հավաքվել են խորհրդարանի դիմաց: Կարգախոսների հիմնական մասը կառավարության հրաժարականի վերաբերյալ  է: Ակցիայի խորհրդանիշն արյունն է՝ ի նշան համերաշխության այն լրագրողների հետ, որոնք վիրավորվել են հուլիսի հինգին: Շատերը գալիս են կարմիր ներկով ծածկված վերնաշապիկներով:

Ռուսթավելի պողոտան արգելափակված է: Կառուցվել է բեմ, տեղադրվել են բարձրախոսներ: Կան բազմաթիվ երիտասարդներ, ընդդիմության առաջնորդներ, ընդդիմադիր հեռուստաընկերությունների ղեկավարներ, ակցիայի մասնակից են նաև լրագրողները: Ոստիկանությունը մոբիլիզացվել է, ոմանք կանգնած են քրիստոնեական խաչի առջև, որը վերջերս այդտեղ են տեղադրել ԼԳԲՏ անձանց հակառակորդները՝  որպես ավանդական արժեքների պաշտպանության խորհրդանիշ:

Ոստիկանական ուժերը մոբիլիզացված են իշխող «Վրացական երազանք» կուսակցության գրասենյակի առջև և խորհրդարանի շենքի դիմաց:

«Մենք կոչ ենք անում ցուցարարներին դուրս չգալ հավաքների և խոսքի ազատության մասին օրենքով թույլատրված սահմաններից: Միևնույն ժամանակ, մենք նախազգուշացնում ենք ակցիայի կազմակերպիչներին՝ չանել բռնության կոչեր և ապահովել, որ գործողությունները չվերածվեն բռնության», - ասված է ՆԳՆ հայտարարության մեջ:

Խորհրդարանի առջև հանրահավաքից առաջ իշխող կուսակցության գրասենյակի դիմաց բախումներ են տեղի ունեցել ոստիկանության հետ: